అర్జెంటీనా : ఫుట్‌బాల్‌ దిగ్గజం లియోనెల్‌ మెస్సీకి ఆ దేశ జాతీయ జట్టు ఘన వీడ్కోలు పలికింది. బెనిన్‌తో జరిగిన అంతర్జాతీయ ఫ్రెండ్లీ మ్యాచ్‌లో అర్జెంటీనా 3–0తో విజయం సాధించగా.. మెస్సీ పెనాల్టీతో గోల్‌ చేయడంతోపాటు రెండు అసిస్ట్‌లు అందించాడు. బ్యూనస్‌ ఎయిర్స్‌లోని మాన్యుమెంటల్‌ స్టేడియంలో 85 వేల మంది అభిమానుల సమక్షంలో జరిగిన ఈ మ్యాచ్‌.. మెస్సీ అంతర్జాతీయ కెరీర్‌కు అధికారికంగా వీడ్కోలు పలికిన సందర్భంగా నిలిచింది. మ్యాచ్‌ 48వ నిమిషంలో మెస్సీ తీసిన కార్నర్‌ కిక్‌ను నికోలస్‌ ఒటమెండి హెడర్‌తో గోల్‌గా మలిచాడు. 61వ నిమిషంలో నికోలస్‌ పాజ్‌ గోల్‌ చేయగా.. అతడికి మెస్సీ అసిస్ట్‌ అందించాడు. 71వ నిమిషంలో లభించిన పెనాల్టీని మెస్సీ ఎడమకాలితో నెట్‌లోకి పంపాడు.
అర్జెంటీనా తరఫున 21 ఏళ్ల అంతర్జాతీయ కెరీర్‌లో మెస్సీ 208 మ్యాచ్‌లు ఆడి 126 గోల్స్‌ చేశాడు. 2022 ప్రపంచకప్‌తో పాటు రెండు కోపా అమెరికా టైటిళ్లను సాధించాడు. మ్యాచ్‌ అనంతరం మెస్సీ మాట్లాడుతూ.. అర్జెంటీనా తరఫున 20 ఏళ్లకు పైగా ఆడటం గర్వంగా ఉందన్నాడు. ఇకపై జట్టుకు అండగా ఉంటూ కొత్త తరం ఆటగాళ్లను ప్రోత్సహిస్తానని చెప్పాడు. 2005లో జాతీయ జట్టులో అరంగేట్రం చేసిన మెస్సీ.. ఎన్నో నిరాశల తర్వాత 2022లో ప్రపంచకప్‌ను ముద్దాడాడు. తన కెరీర్‌లో ఎనిమిది బాలన్‌ డి’ఓర్‌ అవార్డులు గెలిచిన ఏకైక ఫుట్‌బాల్‌ ఆటగాడిగా నిలిచాడు. వీడ్కోలు మ్యాచ్‌కు ముందు బ్యూనస్‌ ఎయిర్స్‌ యూనివర్సిటీ నుంచి గౌరవ డాక్టరేట్‌ను కూడా అందుకున్నాడు.
