కరోనా కారణంగా పలు సాఫ్ట్వేర్ కంపెనీలు ఇప్పటికే వర్క్ ఫ్రమ్ హోమ్ నిర్వహిస్తున్నాయి. ఈ క్రమంలో ప్రముఖ సాఫ్ట్వేర్ దిగ్గజం మైక్రోసాఫ్ట్ కీలక నిర్ణయం తీసుకుంది. ప్రస్తుతం ఇంటి నుండి పనిచేస్తున్న ఉద్యోగుల్లో కొంతమంది ఇకపై శాశ్వతంగా అదే విధానాన్ని కొనసాగించే ప్రత్యామ్నాయాన్ని వారి ముందుంచింది. అయితే, అన్ని రకాల ఉద్యోగులకు ఇది వర్తించదని స్పష్టం చేసింది. ఉద్యోగులకు త‌మ‌కు న‌చ్చితే.. ప‌ర్మినెంట్‌గా ఇంటి నుంచే ప‌ని చేసే అవకాశాన్ని కల్పించనుంది.
కరోనా సంక్షోభం ఇంకా కొన‌సాగుతుండటంతో చాలా వ‌ర‌కు మైక్రోసాఫ్ట్ ఉద్యోగులు ఇంటి నుంచే ప‌నిచేస్తున్నారు. అమెరికాలోని త‌న ఆఫీసుల‌ను జ‌న‌వ‌రి వ‌ర‌కు ఓపెన్ చేసేది లేద‌ని కూడా మైక్రోసాఫ్ట్ ఇప్పటికే స్పష్టం చేసింది. ఒక‌వేళ ఉద్యోగులు శాశ్వతంగా ఇంటి నుంచి ప‌నిచేయాల‌నుకుంటే, వాళ్లు ఆఫీసులో త‌మ స్పేస్‌ను వ‌దులుకోవాల్సి ఉంటుంద‌ని సంస్థ చెప్పింది. వ్య‌క్తిగ‌త వర్క్ స్ట‌యిల్‌కు మ‌ద్ద‌తు ఇచ్చేందుకు వీలైనంత స‌హ‌క‌రిస్తామ‌ని… అదే విధంగా వ్యాపారం కూడా కొన‌సాగేలా చూస్తామ‌న్నారు. ప‌ర్మినెంట్ ప‌ద్ధ‌తిలో ఇంటి నుంచి ప‌ని చేయాల‌నుకున్న‌వాళ్లు త‌మ మేనేజ‌ర్ల నుంచి అనుమ‌తి తీసుకోవాల్సి ఉంటుంది.
