వీపనగండ్ల. వెలుగు: గత ప్రభుత్వ వైఫల్యం వల్ల ఉమ్మడి పాలమూరు జిల్లాలో తాగునీటికి కష్టాలు పడాల్సి వస్తోందని, వచ్చే పార్లమెంట్ ఎన్నికల్లో బీఆర్ఎస్ను బొంద పెట్టాలని మంత్రి జూపల్లి కృష్ణారావు పిలుపునిచ్చారు. వీపనగండ్ల, చిన్నంబావి, పాన్గల్ మండలాలకు తాగునీటిని అందించే గోపాల్ దిన్నె రిజర్వాయర్ను మంత్రి పరిశీలించారు. అనంతరం జూరాల ప్రాజెక్ట్ ఆఫీసర్లతో ఫోన్లో మాట్లాడి నీటి నిల్వపై ఆరా తీశారు. వేసవిలో తాగునీటికి ఇబ్బందులు రాకుండా చర్యలు తీసుకోవాలని ఆదేశించారు.
ఓ మాజీ మంత్రి బంధువు వ్యవసాయ పొలానికి ప్రత్యేక పైప్లైన్ ఏర్పాటు చేసుకొని 50 హెచ్పీ మోటార్ సాయంతో అక్రమంగా నీటిని తరలించుకుపోతున్న విషయాన్ని పలువురు రైతులు మంత్రి దృష్టికి తీసుకెళ్లారు. స్పందించిన మంత్రి జూరాల, విద్యుత్ శాఖ ఆఫీసర్లతో మాట్లాడి మోటార్ కు కరెంట్ కనెక్షన్ తొలగించాలని ఆదేశించారు. అక్రమంగా విద్యుత్ వినియోగించుకున్నట్లు తేలితే కేసు నమోదు చేయాలని విద్యుత్ శాఖ ఎస్ఈకి సూచించారు. ఈ సందర్భంగా మంత్రి మాట్లాడుతూ సాగునీటి అవసరాల కోసం జూరాల ప్రాజెక్టుకు 5 టీఎంసీల నీటిని విడుదల చేయాలని కర్నాటక ప్రభుత్వంతో ఇప్పటికే సీఎం మాట్లాడారని తెలిపారు.
చిన్నంబావి, వీపనగండ్ల, పాన్గల్ మండలాల తాగునీటి అవసరాలకు జూరాల నుంచి నీటిని వదిలేలా చర్యలు తీసుకున్నట్లు చెప్పారు. కొల్లాపూర్ ప్రాంతానికి సింగోటం, జొన్నల బగుడా రిజర్వాయర్ ద్వారా సాగునీటిని అందిస్తామన్నారు. గత ప్రభుత్వం ముందుచూపు లేకుండా నీటిని వృథా చేసిందని విమర్శించారు. పార్లమెంట్ ఎన్నికల్లో లబ్ధి పొందడానికి సాగునీటి విషయంలో అనవసర రాద్ధాంతం చేస్తున్న బీఆర్ఎస్ పార్టీని బొంద పెట్టాలన్నారు. రాంచంద్రారెడ్డి, బాల్రెడ్డి, నారాయణరెడ్డి, ఎత్వం కృష్ణయ్య, గంగిరెడ్డి, బీచుపల్లి, రంజిత్ కుమార్ పాల్గొన్నారు.
తాగునీటిని అందించాలి..
చిన్నంబావి: వేసవిలో ప్రజలకు తాగునీటి ఇబ్బందులు రాకుండా చర్యలు తీసుకోవాలని మంత్రి జూపల్లి కృష్ణారావు సంబంధిత అధికారులను ఆదేశించారు. మండలంలో పర్యటించి సమస్యలను అడిగి తెలుసుకున్నారు.
