హైదరాబాద్, వెలుగు: హైదరాబాద్ బుక్ ఫెయిర్–38 లోగోను గురువారం రవీంద్రభారతిలో మంత్రి జూపల్లి కృష్ణారావు ఆవిష్కరించారు. డిసెంబర్19 నుంచి 29 వరకు ఎన్టీఆర్ స్టేడియంలో ఈ బుక్ ఫెయిర్ జరుగనుందని నిర్వాహకులు తెలిపారు. మంత్రి మాట్లాడుతూ.. సామాజిక రుగ్మతలను రూపుమాపి ప్రజల్లో పరివర్తన తీసుకొచ్చే దిశగా సాంస్కృతిక శాఖ ఆధ్వర్యంలో ప్రభాతభేరి కార్యక్రమాన్ని చేపట్టామన్నారు.
యువకులు, విద్యార్థుల్లో చైతన్యం కలిగించడానికి హైదరాబాద్ బుక్ ఫెయిర్లో ప్రభాతభేరి పేరిట విస్తృత ప్రచారం నిర్వహించేందుకు ప్రత్యక స్టాల్, హోర్డింగ్ ఏర్పాటు చేయాలని నిర్వాహకులకు సూచించారు. తెలంగాణ పర్యాటక ప్రదేశాలు, సాంస్కృతికశాఖ కార్యక్రమాల ప్రచార స్టాల్స్ ను కూడా ఏర్పాటు చేయాలని చెప్పారు. దీనికి ప్రభుత్వం నుంచి సహకారం అందిస్తామని వెల్లడించారు.
