- పలు నేషనల్ హైవే ప్రాజెక్ట్స్ పై చర్చ
హైదరాబాద్, వెలుగు: నేషనల్ హైవే అథారిటీ ఆఫ్ ఇండియా (ఎన్హెచ్ఏఐ) చైర్మన్ సంతోష్ కుమార్ యాదవ్తో రాష్ట్ర రోడ్లు, భవనాల శాఖ మంత్రి కోమటిరెడ్డి వెంకట్ రెడ్డి ఆదివారం హైదరాబాద్లో ప్రత్యేకంగా భేటీ అయ్యారు. రాష్ట్రంలోని పలు జాతీయ రహదారుల ప్రాజెక్టులు, ముఖ్యంగా రీజినల్ రింగ్ రోడ్డు (ఆర్ఆర్ఆర్) పురోగతిపై సుదీర్ఘంగా చర్చించారు. నిత్యం ప్రమాదాలతో 'డెత్ రోడ్'గా మారుతున్న హైదరాబాద్ - విజయవాడ (ఎన్హెచ్65) రహదారిపై మంత్రి ప్రత్యేకంగా దృష్టి సారించారు.
ప్రయాణికుల రక్షణ దృష్ట్యా ఈ రహదారిని ఎనిమిది లైన్లుగా విస్తరించే పనులను యుద్ధ ప్రాతిపదికన ప్రారంభించాలని ఎన్హెచ్ఏఐ చైర్మన్ను కోరారు. ఎల్బీనగర్ నుంచి హయత్ నగర్ వరకు 7.1 కిలోమీటర్ల మేర డబుల్ డెక్కర్ ఎలివేటెడ్ కారిడార్ నిర్మించాలని రాష్ట్ర ప్రభుత్వం నిర్ణయించిందని మంత్రి తెలిపారు. దీనికి సంబంధించిన డిటైల్డ్ ప్రాజెక్ట్ రిపోర్ట్ (డీపీఆర్)ను ఇప్పటికే కేంద్ర ఉపరితల రవాణా శాఖ (మోర్త్) కార్యాలయానికి పంపినట్లు ఆయన గుర్తుచేశారు.
నాగపూర్ తరహాలో చేపట్టబోయే ఈ ప్రాజెక్టుకు త్వరితగతిన అనుమతులు ఇచ్చి పనులు ప్రారంభించాలని విజ్ఞప్తి చేశారు. ఎన్హెచ్ఏఐ చైర్మన్ సంతోష్ కుమార్ యాదవ్ సానుకూలంగా స్పందించారు. ట్రిపుల్ ఆర్ ఉత్తర భాగం, హైదరాబాద్ - విజయవాడ రోడ్డు విస్తరణ పనులకు సంబంధించి టెండర్ ప్రక్రియ తుది దశలో ఉందని, త్వరలోనే పనులు ప్రారంభించేందుకు అన్ని ఏర్పాట్లు చేస్తున్నామని మంత్రికి వివరించారు. రాష్ట్ర అభివృద్ధిలో కీలకమైన ఈ ప్రాజెక్టులను వేగంగా పూర్తి చేస్తామని హామీ ఇచ్చారు. మంత్రి వెంట రోడ్లు భవనాల శాఖ స్పెషల్ సీఎస్ వికాస్ రాజ్, ప్రత్యేక కార్యదర్శి ప్రావిణ్య, సీఈలు ధర్మారెడ్డి, రాజేశ్వర్ రెడ్డి తదితరులు ఉన్నారు.
