- చొప్పదండి, సిరిసిల్ల నియోజకవర్గాల్లో కేటీఆర్ రోడ్‌‌షో
రాజన్నసిరిసిల్ల, చొప్పదండి, వెలుగు: మళ్లీ గెలిపిస్తే వారానికి 2 రోజులు సిరిసిల్ల ప్రజలకు అందుబాటులో ఉంటానని మంత్రి కేటీఆర్ హామీ ఇచ్చారు. ఆదివారం ఎన్నికల ప్రచారంలో భాగంగా సిరిసిల్ల నియోజకవర్గంలోని గంభీరావుపేట, ఎల్లారెడ్డిపేట, వీర్నపల్లి మండలాల్లో, చొప్పదండిలో రోడ్ షో నిర్వహించారు. ఈ సందర్భంగా ఆయన మాట్లాడుతూ ఉమ్మడి రాష్ట్రంలో కాంగ్రెస్‌‌కు 11 సార్లు అవకాశమిచ్చినా కరెంట్, సాగునీరు ఇవ్వకుండా ప్రజలను గోస పెట్టిందన్నారు.
కాంగ్రెస్ వస్తే కరెంట్ కష్టాలు తప్పవన్నారు. కరెంట్ఎక్కడ ఉందని రేవంత్రెడ్డి మాట్లాడుతున్నాడని, వారి కోసం ప్రత్యేక బస్సు ఏర్పాటు చేస్తామని.. రాష్ట్రంలో ఎక్కడికైనా వెళ్లి కరెంట్ తీగలు పట్టుకొని కరెంట్లేదని నిరూపించాలని సవాల్ విసిరారు. 18 ఏండ్లు నిండిన ప్రతి మహిళకు సౌభాగ్యలక్ష్మి పేరిట రూ.3వేలు అందజేస్తామన్నారు. తనను మళ్లీ గెలిపిస్తే సిరిసిల్ల నియోజకవర్గంలో ప్రతి మండలానికో స్కిల్ డెవలప్ మెంట్ సెంటర్ఏర్పాటు చేస్తానన్నారు.
తాను ఎమ్యెల్యే అయ్యాక సిరిసిల్ల కోనసీమగా మారిందన్నారు. తండాలను జీపీలుగా మార్చిన ఘనత సీఎం కేసీఆర్‌‌‌‌దేనన్నారు. ప్రతిపక్షాల మాటలు విని ఆగం కావద్దొని, ఆలోచన చేసి కారు గుర్తుకు ఓటేయాలన్నారు. ఈ సందర్భంగా చొప్పదండి ఎమ్మెల్యేగా మరోసారి సుంకె రవిశంకర్ను గెలిపించాలని కోరారు. రోడ్ షోలో లీడర్లు రవీందర్ రెడ్డి, రవీందర్, సౌజన్య, మల్లారెడ్డి, చుక్కారెడ్డి, రాజశేఖర్, విజయలక్ష్మి, శ్రీనివాస్రెడ్డి పాల్గొన్నారు. కాగా గంభీరావుపేటలో మంత్రి కేటీఆర్ రోడ్ షో సందర్భంగా ఏర్పాటు చేసిన ఎల్ఈడీ స్క్రీన్లు కూలి గ్యారా నర్సవ్వ, ఓ వర్కర్‌‌‌‌కు గాయాలయ్యాయి.
