బషీర్ బాగ్, వెలుగు: రాష్ట్రంలో కాంగ్రెస్ పార్టీ అధికారంలోకి వస్తే బీసీల కుల గణన చేపడుతామని రాహుల్ గాంధీ హామీ ఇచ్చి మేనిఫెస్టోలో పెట్టారని.. ఆ హామీని అమలు చేసే బాధ్యతను తాను తీసుకుంటానని రాష్ట్ర రవాణా, బీసీ సంక్షేమ శాఖ మంత్రి పొన్నం ప్రభాకర్ గౌడ్ అన్నారు. తెలంగాణ గౌడ సంఘం, పీసీసీ కల్లుగీత శాఖ ఆధ్వర్యంలో శుక్రవారం హైదరాబాద్ నాంపల్లిలోని పొట్టి శ్రీరాములు తెలుగు విశ్వవిద్యాలయ సమావేశ మందిరంలో మంత్రి పొన్నం ప్రభాకర్ గౌడ్ ను ఘనంగా సన్మానించారు. ఈ సందర్భంగా మంత్రి మాట్లాడుతూ.. కుల గణన జరిగితేనే బీసీల లెక్కలు తేలుతాయని, అప్పుడు జనాభా ప్రాతిపదికన రిజర్వేషన్లు లభిస్తాయన్నారు. రెండు ప్రధాన పార్టీల నుంచి 8 మంది గౌడ కులస్తులు పోటీ చేస్తే, అందులో నలుగురు గెలిచారని.. కాంగ్రెస్ పార్టీ నుంచి తానొక్కడినే విజయం సాధించానని పొన్నం చెప్పారు. బీసీలు ఐక్యంగా ఉన్నప్పుడే అభివృద్ధి జరుగుతుందని ఆయన తెలిపారు.
