రైతు కన్నీటిలో ఓట్లు వెతకడం నీచ రాజకీయం : మంత్రి ఉత్తమ్ కుమార్ రెడ్డి

• బీఆర్ఎస్​ నేతలపై మంత్రి ఉత్తమ్ కుమార్ రెడ్డి ఫైర్ 

నేరేడుచర్ల, వెలుగు: రాష్ట్రంలో కరువు పరిస్థితిని చూసి బీఆర్ఎస్​ నేతలు సంబురపడుతున్నారని నీటిపారుదల, పౌర సరఫరాల శాఖ మంత్రి ఉత్తమ్ కుమార్ రెడ్డి విమర్శించారు. ఎల్​నినో ప్రభావంతో వర్షాభావం నెలకొందని, ఈ సమయంలో రైతులకు భరోసా కల్పించాల్సిన ప్రతిపక్షం.. పంటలు ఎండిపోవాలని కోరుకుంటోందని మండిపడ్డారు.

సూర్యాపేట జిల్లా నేరేడుచర్ల మండలం మేడారంలో రూ.26.40 కోట్లతో నిర్మించిన నేరేడుచర్ల, -దూపాడు డబుల్ రోడ్డును, నేరేడుచర్ల గ్రంథాలయ భవనాన్ని, జానల్దిన్నె గ్రామపంచాయతీ భవనాన్ని బుధవారం మంత్రి ప్రారంభించారు. అనంతరం జరిగిన సభలో ఆయన మాట్లాడారు. ఎల్​నినో కాంగ్రెస్ ఆఫీసులో పుట్టిన పదం కాదని, ప్రపంచవ్యాప్తంగా వాతావరణాన్ని ప్రభావితం చేస్తున్నదని పేర్కొన్నారు.

ఎల్​నినో ఆకాశంలో వర్షాలను అడ్డుకుంటే.. ఇక్కడ బీఆర్ఎస్ అబద్ధాల వరద పారిస్తోందన్నారు. ఈ అంశాన్ని బీఆర్ఎస్​ రాజకీయ ఆయుధంగా వాడుకోవడం, రైతు కన్నీటిలో ఓట్లు వెతకడం నీచమైన రాజకీయమన్నారు. జూరాల ఆయకట్టుకు నీటి విడుదలలో సానుకూలంగా స్పందించిన ఆ రాష్ట్ర ముఖ్యమంత్రి డీకే శివకుమార్​కు మంత్రి కృతజ్ఞతలు తెలిపారు.

ఆయనతో తనకున్న వ్యక్తిగత స్నేహాన్ని తెలంగాణ రైతుల ప్రయోజనాల కోసం వినియోగించానన్నారు. పంటలను కాపాడేందుకు అవసరమైన చోట నీటి విడుదల, ప్రత్యామ్నాయ వనరుల వినియోగంపై అధికారులకు ఆదేశాలిచ్చినట్టు తెలిపారు. ఇటీవల నిర్వహించిన కోదాడ మెగా జాబ్ మేళా విజయవంతం కావడం ఈ ప్రాంత యువతపై ప్రభుత్వానికి ఉన్న చిత్తశుద్ధికి నిదర్శనమని చెప్పారు.