హైదరాబాద్: 2024 పార్లమెంట్ ఎన్నికల్లో బీఆర్ఎస్ ఓట్లు అన్నీ బీజేపీకి పడ్డాయని.. అందుకు ప్రతిఫలంగా ఇప్పుడు జూబ్లీహిల్స్ ఉప ఎన్నికలో బీజేపీ ఓట్లు బీఆర్ఎస్కు మళ్లీస్తున్నారని మంత్రి వివేక్ వెంకటస్వామి అన్నారు. జూబ్లీహిల్స్ తమ పోటీ సీరియస్ కాదని బీజేపీ నేతలే చెప్తున్నారన్నారు. సోమవారం (నవంబర్ 3) టోలిచౌకిలోని జానకినగర్లో మైనార్టీ నేతల సమావేశం జరిగింది.
ఈ సమావేశానికి మంత్రులు వివేక్ వెంకటస్వామి, అజారుద్దీన్, ఎమ్మెల్యే కౌసర్ మొయినొద్దీన్, ఫుడ్ కార్పొరేషన్ చైర్మన్ ఫయీమ్ హాజరయ్యారు. ఈ సందర్భంగా మంత్రి వివేక్ మాట్లాడుతూ.. జూబ్లీహిల్స్ ఉప ఎన్నికలో భాగంగా తాను షేక్ పేట్ డివిజన్ ఇంచార్జ్ బాధ్యతలు చేపట్టాక.. డివిజన్లో ఎక్కడ ఏ సమస్యలు ఉన్నాయో తెలుసుకున్నానని అన్నారు.
చాలా పనులు చేయించా ఇంకా చేయాల్సినవి పనులు ఉన్నాయని.. అవి తొందరలోనే చేయిస్తామని హామీ ఇచ్చారు. జూబ్లీహిల్స్ బైపోల్లో కాంగ్రెస్ను గెలిపిస్తే నవీన్ యాదవ్, అజారుద్దీన్ తో పాటు నేను కూడా మీకు అండగా ఉంటానని.. అభివృద్ధి పనులు ఇంకా చేయించుకోవచ్చన్నారు. నవీన్ యాదవ్ మంచి నాయకుడని... మీరంతా కాంగ్రెస్ పార్టీకి ఓటు వేసి గెలిపించాలని కోరారు
