హైదరాబాద్, వెలుగు: హిమాచల్ ప్రదేశ్లో తెల్ల ఏనుగు లాంటి హైడల్ ప్రాజెక్టు నిర్మాణానికి టీజీ జెన్కోను రంగంలోకి దించుతూ సీఎం రేవంత్ రెడ్డి తుగ్లక్ చర్యకు పాల్పడుతున్నారని బీఆర్ఎస్ ఎమ్మెల్యే హరీశ్ రావు విమర్శించారు. అప్పులు పుట్టడం లేదని, తమను ఎవరూ నమ్మడం లేదని ప్రతీ వేదికపై చెప్పుకుంటున్న రేవంత్ రెడ్డి.. ఇప్పుడు ఆ హైడల్ పవర్ ప్రాజెక్టుకు రూ.6,200 కోట్లు ఎలా ఖర్చు పెట్టబోతున్నారని శుక్రవారం ఓ ప్రకటనలో ప్రశ్నించారు.
హిమాచల్ హైడల్ ప్రాజెక్టు నుంచి మోసర్ బేర్ వంటి ప్రతిష్టాత్మక కంపెనీ పారిపోయినా, ఎన్టీపీసీ లాంటి కేంద్ర ప్రభుత్వరంగ కంపెనీ 3 ఏండ్ల తర్వాత సాధ్యం కాదని వదిలేసినా.. 510 మెగావాట్ల ప్లాంట్ నిర్మాణానికి టీజీ జెన్ కో ఒప్పందం ఎందుకు చేసుకుందో కాంగ్రెస్ ప్రభుత్వం చెప్పాలన్నారు.
