పాలకుర్తి, వెలుగు : మాజీ మంత్రి ఎర్రబెల్లి దయాకర్ రావు నియోజక వర్గ రైతులపై మొసలి కన్నీరు కారుస్తున్నారని, ఆయన చేసిన తప్పుల వల్లనే ఇప్పుడు రైతులు సాగునీటి కోసం ఇబ్బందులు పడుతున్నారని ఎమ్మెల్యే మామిడాల యశస్వినిరెడ్డి అన్నారు. మంగళవారం జనగామ జిల్లా పాలకుర్తి మండల కేంద్రంలోని మిషన్ భగీరథ గెస్ట్ హౌస్లో ఏర్పాటు చేసిన ప్రెస్మీట్లో కాంగ్రెస్ నియోజక వర్గ ఇన్చార్జి హనుమాండ్ల ఝాన్సీరెడ్డితో కలిసి మాట్లాడారు.
కాంగ్రెస్ ప్రభుత్వం ఏర్పడి మూడు నెలలే అయిందని అన్నారు. దేవరుప్పుల మండల రైతులకు సాగునీరు అందించేందుకు గత 15 రోజులుగా తాను ఎప్పటికప్పుడు ఇరిగేషన్ ఉన్నతాధికారులతో మాట్లాడానని, నీళ్లు విడుదల అవుతున్న విషయం తెలుసుకున్న ఎర్రబెల్లి పంటల పరిశీలన పేరుతో ఫొటోలకు ఫోజులిచ్చారని ఆరోపించారు. 15 ఏండ్లుగా పాలకుర్తి నియోజకవర్గానికి ఎమ్మెల్యేగా మంత్రిగా ఉన్న ఎర్రబెల్లి.. కనీసం రిజర్వాయర్కు గేట్లు కూడా ఏర్పాటు చేయలేదని ఆరోపించారు.
ఝాన్సీరెడ్డి మాట్లాడుతూ ఎర్రబెల్లి కాలువల్లో కనీసం మట్టికూడా తీయలేదని, కొన్ని ప్రాంతాలకు తమ సొంత ఖర్చులతో పైప్లైన్ ఏర్పాటు చేసి రైతులకు సాగునీరు అందించే ప్రయత్నం చేశామన్నారు. కాంగ్రెస్ అంటేనే రైతుల ప్రభుత్వమని దేవాదుల ప్రాజెక్ట్ను నిర్మించిన ఘనత కాంగ్రెస్దే అని గుర్తు చేసారు. కార్యక్రమంలో కాంగ్రెస్ నియోజక వర్గ నాయకులు కాకిరాల హరి ప్రసాద్, కేతిరెడ్డి నిరంజన్ రెడ్డి, పాలకుర్తి, దేవరుప్పుల, కొడకండ్ల మండల పార్టి అధ్యక్షులు గిరగాని కుమారస్వామి గౌడ్, పెద్ది కృష్ణమూర్తి గౌడ్, సురేశ్ నాయక్, బ్లాక్ కాంగ్రెస్ అద్యక్షులు రాపాక సత్యనారాయణ, అమ్యానాయక్, జాటోతు నెహ్రూ తదితరులు ఉన్నారు.
తొర్రూరును మోడల్ మున్సిపాలిటిగా తీర్చిదిదుతా
తొర్రూరు : తొర్రూరును రాష్ట్రంలోనే మోడల్ మున్సిపాలిటీగా తీర్చిదిదుతానని ఎమ్మెల్యే యశస్వినిరెడ్డి తెలిపారు. మంగళవారం మహబూబాబాద్ జిల్లా తొర్రూరు మున్సిపల్ కార్యాలయంలో 2024– -25 బడ్జెట్ సమావేశాన్ని చైర్మన్ రామచంద్రయ్య అధ్యక్షతన నిర్వహించారు. చీఫ్గెస్ట్గా ఎమ్మెల్యే హాజరయ్యారు. ఈ సందర్భంగా ఎమ్మెల్యే మాట్లాడుతూ రూ. 39.19 కోట్ల బడ్జెట్ను ప్రవేశపెట్టడం అభినందనీయమన్నారు. కార్యక్రమంలో మున్సిపల్ ఫ్లోర్ లీడర్ ఎన్నమనేని శ్రీనివాసరావు. మున్సిపల్ ఏఈ రంజిత్, కౌన్సిలర్లు భూసాని రాము, తునం రోజా, తూర్పాటి సంగీత రవి, పేర్ల యమునా జంపా, దారావత్ సునీతజైసింగ్ పాల్గొన్నారు.
