గద్వాల, వెలుగు: బాధలు ఎన్ని ఉన్నా మనం బిల్డప్ మెయింటెయిన్ చేస్తేనే నాయకులుగా చలామణి అవుతారని ఎమ్మెల్సీ రవీందర్ రావు అన్నారు. ఆదివారం జోగులాంబ గద్వాల జిల్లా గట్టు మండల కేంద్రంలో బీఆర్ఎస్ ఆత్మీయ సమ్మేళనం ఎమ్మెల్యే బండ్ల కృష్ణమోహన్ రెడ్డి అధ్యక్షతన నిర్వహించారు. ముఖ్యఅతిథిగా హాజరైన రవీందర్రావు మాట్లాడుతూ.. లీడర్లుగా ఎదగాలంటే బిల్డప్ ఉండాలన్నారు.
కారు, మంచి ఇల్లు, భార్య మెడలో గోల్డ్, పిల్లలను మంచి స్కూల్లో చదివించడం, మంచి ఫోన్ ఉండడం ఇలా అన్ని మెయింటెయిన్చేస్తేనే లీడర్ గా ఎదుగుతారని, నలుగురూ మన దగ్గరకు వస్తారన్నారు. ఈ స్టేజీ మీద ఉన్నవారు సైతం అలానే ఎంపీపీలు, జడ్పీటీసీలు అయ్యారన్నారు. కానీ వారి బాధలు చెప్పుకుంటే వర్ణణాతీతంగా ఉంటాయని, అయినా అలాగే ఉండక తప్పదన్నారు. పార్టీ కార్యక్రమాలను ప్రజల్లోకి తీసుకెళ్లాలని కార్యకర్తలకు సూచించారు.
