మీరట్: ముస్కాన్ రస్తోగి.. ఈ పేరు గుర్తుండే ఉంటుంది. మీరట్లో ప్రియుడితో కలిసి భర్తను చంపి.. డెడ్ బాడీని 15 ముక్కలుగా కోసి, డ్రమ్ములో వేసి, సిమెంటుతో సీల్ చేసిన వివాహితనే ఈ ముస్కాన్ రస్తోగి. చేసిన నేరానికి ప్రస్తుతం మీరట్ జైలులో శిక్ష అనుభవిస్తున్న ఈ వివాహిత ఆడ బిడ్డకు జన్మనిచ్చింది. ఆదివారం ఆమెకు పురిటి నొప్పులు రావడంతో ఆమెను హాస్పిటల్కు తరలించి.. ఆమె కుటుంబ సభ్యులకు జైలు అధికారులు విషయం తెలియజేశారు. అయినప్పటికీ కూతురు ప్రసవిస్తున్న సమయంలో కూడా ఆమె కుటుంబం కనీసం ఆమెను చూడటానికి కూడా వెళ్లలేదు.
సోమవాం సాయంత్రం ముస్కాన్ రస్తోగికి ఆడ బిడ్డ పుట్టింది. ఆమె చేసిన తప్పు గురించి ఇటు మీడియాలో వార్తలు, అటు సోషల్ మీడియాలో బ్లూ డ్రమ్ముపై సెటైర్లు.. ఇలా ముస్కాన్ చేసిన పనికి ఆమె కుటుంబం తీవ్ర మానసిక క్షోభ అనుభవించింది. ఈ క్రమంలోనే.. బిడ్డను కని ఆసుపత్రిలో ఉన్న కన్న కూతురిని చూసేందుకు కూడా ఆమె కుటుంబం వెళ్లలేదు. తల్లీబిడ్డా క్షేమంగా ఉన్నారని వైద్యులు తెలిపారు. పుట్టిన పాప 2.4 కేజీలు ఉందని చెప్పారు.
మర్చంట్ నేవీ ఆఫీసర్ తన భర్తను ముస్కాన్ ప్రియుడితో కలిసి హత్య చేసిన ఘటన 2025, మార్చిలో దేశవ్యాప్తంగా చర్చనీయాంశం అయిన సంగతి తెలిసిందే. డెడ్బాడీని15 ముక్కలుగా నరికి.. ప్లాస్టిక్ డ్రమ్ములో వేసి సిమెంట్‌తో సీల్ చేశారు. ఈ దారుణ ఘటన ఉత్తరప్రదేశ్‌ మీరట్లో జరిగింది. మర్చంట్ నేవీ అధికారి అయిన సౌరభ్ రాజ్‌‌‌‌పుత్, ముస్కాన్ రస్తోగి 2016లో లవ్ మ్యారేజ్ చేసుకున్నారు. భార్యతో ఎక్కువ సమయం గడపాలనే ఉద్దేశంతో సౌరభ్ తన ఉద్యోగాన్ని వదులుకున్నాడు. అయితే, లవ్ మ్యారేజ్ చేసుకోవడం, జాబ్ వదిలేయటం వంటి సౌరభ్ నిర్ణయాలు అతని కుటుంబానికి నచ్చలేదు. అందువల్ల ఇంట్లో తరచూ గొడవలు జరిగేవి. దాంతో సౌరభ్ తన భార్యతో కలిసి వేరుగా ఉండాలని నిర్ణయించుకున్నాడు.
మూడేండ్ల క్రితం ఇందిరానగర్‌లోని అద్దె ఇంట్లోకి షిఫ్ట్ అయ్యాడు. 2019లోనే వారికి ఒక కుమార్తె కూడా పుట్టింది. వేరు కాపురం పెట్టాక ముస్కాన్ ప్రవర్తనలో మార్పు వచ్చింది. ముస్కాన్ తన లవర్ సాహిల్‌తో వివాహేతర సంబంధం కొనసాగిస్తున్నట్లు సౌరభ్‌‌కు తెలిసింది. దాంతో దంపతుల మధ్య తరచూ గొడవలు జరిగేవి. తన కూతురు భవిష్యత్తును దృష్టిలో ఉంచుకుని సౌరభ్ విడాకుల నిర్ణయాన్ని కూడా వెనక్కి తీసుకున్నాడు. 2023లో మళ్లీ మర్చంట్ నేవీలో జాబ్లో చేరాడు.
ఫిబ్రవరి 28న తన కూతురు బర్త్ డే ఉండటంతో సౌరభ్ ఫిబ్రవరి 24న తన ఇంటికి వచ్చాడు. ఈ క్రమంలోనే మార్చి 4న సౌరభ్ తినే ఆహారంలో ముస్కాన్ నిద్రమాత్రలు కలిపింది. ఆపై సాహిల్, ముస్కాన్ కలిసి సౌరభ్ను కత్తితో పొడిచి చంపారు. డెడ్ బాడీని 15 ముక్కలుగా కోసి, డ్రమ్ములో వేసి, సిమెంటుతో సీల్ చేశారు. సౌరభ్ గురించి అడిగిన వాళ్లకు అతను హిమాచల్ ప్రదేశ్కు టూర్ వెళ్లాడని చెప్పి ముస్కాన్ నమ్మించింది. కానీ సౌరభ్ తమ కాల్స్ లిఫ్ట్ చేయకపోవడంతో అతడి తల్లిదండ్రులు పోలీసులకు ఫిర్యాదు చేశారు. దర్యాప్తులో భాగంగా ముస్కాన్, సాహిల్ ను విచారించగా.. సౌరభ్ను చంపేసినట్లు ఒప్పుకున్నారని పోలీసులు తెలిపారు.
