- నల్గొండ జిల్లాలో ఇరు వర్గాల మధ్య తారస్థాయికి చేరిన విభేదాలు
- గుత్తా కొడుకు అమిత్ పొలిటికల్ ఎంట్రీకి జగదీశ్ వర్గీయుల అడ్డుపుల్ల
- నల్గొండ, భువనగిరి స్థానాల్లో అమిత్కు వ్యతిరేకంగా తెరపైకి కొత్త పేర్లు
- హైకమాండ్తో తాడోపేడో తేల్చుకునే పనిలో సుఖేందర్రెడ్డి
నల్గొండ, వెలుగు: ఉమ్మడి నల్గొండ జిల్లాలో బీఆర్ఎస్ సీనియర్ లీడర్, శాసన మండలి చైర్మన్ గుత్తా సుఖేందర్రెడ్డికి సొంత పార్టీ నేతలే పొగ పెడుతున్నారు. గుత్తా తన కొడుకు అమిత్రెడ్డిని రాజకీయాల్లోకి తెచ్చేందుకు చేస్తున్న ప్రయత్నాలను పార్టీలోని ఓ బలమైన వర్గం మొదటి నుంచీ అడ్డుకుంటోంది. మునుగోడు బైపోల్స్, ఆ తర్వాత అసెంబ్లీ ఎన్నికలు, తీరా ఇప్పుడు ఎంపీ ఎన్నికల్లోనూ అమిత్పొలిటికల్ ఎంట్రీకి మాజీ మంత్రి జగదీశ్రెడ్డి అడ్డుగోడగా మారిన తీరుపై రాజకీయ వర్గాల్లో చర్చ జరుగుతోంది.
మునుగోడు బై పోల్స్ నుంచే..
మునుగోడు ఉప ఎన్నికల్లోనే తన కొడుకు అమిత్ను రంగంలోకి దించాలని సుఖేందర్రెడ్డి భావించారు. కానీ జగదీశ్రెడ్డి సహా ఆయన వర్గానికి చెందిన అప్పటి ఎమ్మెల్యేలు అమిత్కు వ్యతిరేకంగా హైకమాండ్వద్ద పావులు కదిపి మాజీ ఎమ్మెల్యే కూసుకుంట్ల ప్రభాకర్రెడ్డిని బరిలో నిలిపారు. ఆ తర్వాత జరిగిన అసెంబ్లీ ఎన్నికల్లో నల్గొండ, మునుగోడు సీట్లలో ఏదో ఒకటి తనకు వస్తుందని అమిత్ఆశించారు. అప్పటి పరిస్థితుల్లో అభ్యర్థులను మార్చే జాబితాలో మునుగోడు కూడా ఉండడం, ఆ సీటు ఎలాగైనా అమిత్కు ఇస్తానని స్వయంగా కేటీఆర్ హామీ ఇవ్వడంతో అమిత్మునుగోడు రాజకీయాల్లో యాక్టివ్రోల్పో షించారు. కానీ హైకమాండ్ సిట్టింగులకే మళ్లీ అవకాశం ఇవ్వడంతో అమిత్కు మరోసారి నిరాశే ఎదురైంది. అసెంబ్లీ సీటు ఇవ్వనందున ఎంపీ సీటు కచ్చితంగా ఇస్తామని అప్పట్లో హైకమాండ్హామీ ఇచ్చినట్లు ప్రచారం జరిగింది.
ఎంపీ టికెట్ దక్కకుండా..
నల్గొండ ఎంపీగా రెండు సార్లు పనిచేసిన అనుభవంతో తన కొడుకు అమిత్ను ఇక్కడి నుంచి బరిలో దింపాలని సుఖేందర్రెడ్డి భావిస్తున్నారు. కానీ మాజీ మంత్రి జగదీశ్సహా ఆయన వర్గానికి చెందిన హుజూర్నగర్, నల్గొండ, దేవరకొండ మాజీ ఎమ్మెల్యేలు అమిత్అభ్యర్థిత్వాన్ని వ్యతిరేకిస్తున్నారు. గుత్తాకు వ్యతిరేకంగా కొత్త నాయకులను జగదీశ్వర్గం ఎగదోస్తున్నట్లు పార్టీలో చర్చ జరుగుతోంది. ఇందులో భాగంగానే నల్గొండ లోక్సభ స్థానానికి మాజీ ఎమ్మెల్యే కంచర్ల భూపాల్రెడ్డి అన్న కృష్ణారెడ్డి, మాజీ ఎమ్మెల్సీ తేరా చిన్నపరెడ్డి, హుజూర్నగర్ మాజీ ఎమ్మెల్యే శానంపూడి సైదిరెడ్డి పేర్లను ఆ వర్గం తెరపైకి తెచ్చింది.
ఇది చాలదన్నట్లు నల్గొండ ఎంపీ సీటును అయితే బీసీలకు, లేదంటే ఎస్టీలకు ఇచ్చే ఆలోచన చేస్తున్నామని జగదీశ్రెడ్డి స్వయంగా చెప్పడం మరింత వేడి పుట్టించింది. మాజీ మంత్రి, ఎమ్మెల్యేల తీరుతో తీవ్ర మనస్తాపానికి గురైన సుఖేందర్రెడ్డి హైకమాండ్ను కలిసి నల్గొండ కుదరకపోతే భువనగిరి నుంచైనా తన కొడుక్కి ఛాన్స్ ఇవ్వాలని కోరారు. కానీ అక్కడ కూడా జగదీశ్వర్గం మరో మాజీ ఎమ్మెల్యే శేఖర్రెడ్డి పేరును తెరపైకి తెచ్చింది. మునుగోడు, తుంగతుర్తి మాజీ ఎమ్మెల్యేలు గాదరి కిషోర్కుమార్, కూసుకుంట్ల ప్రభాకర్ రెడ్డిని కలిసి శేఖర్ రెడ్డికి మద్దతు ఇవ్వాలని కోరింది. ఒకవేళ శేఖర్ రెడ్డి ఒప్పుకోకపోతే బీసీ కోటాలో పొన్నాల లక్ష్మయ్య, బూడిద భిక్షమయ్యగౌడ్ లో ఎవరో ఒకరిని దింపాలని జగదీశ్ వర్గం ఆలోచన చేస్తున్నట్లు ప్రచారం జరుగుతోంది.
హైకమాండ్కు ఫిర్యాదుతో గుత్తా వర్గీయులు ఫైర్
తాజాగా అమిత్రెడ్డికి టికెట్ ఇవ్వవద్దని జగదీశ్, ఆయన వర్గం ఎమ్మెల్యేలంతా హైకమాండ్కు తేల్చి చెప్పినట్లు తెలుస్తోంది. గుత్తా.. జిల్లాలో గ్రూపు రాజకీయాలను పెంచిపోషిస్తున్నాడని, అసెంబ్లీ ఎన్నికలకు ముందు నల్గొండ, దేవరకొండ, మునుగోడు, హుజూర్నగర్నియోజకవర్గాల్లో తన క్యాడర్మొత్తాన్ని గంపగుత్తగా కాంగ్రెస్లో చేర్పించి తమ ఓటమికి కారణమయ్యారని ఫిర్యాదు చేసినట్టు సమాచారం.
ఈ విషయం తెలిసి గుత్తా వర్గీయులు అగ్గి మీద గుగ్గిలం అవుతున్నారు. కాంగ్రెస్నుంచి బీఆర్ఎస్లో చేరినప్పటి నుంచి ఉమ్మడి జిల్లాలో పార్టీ పటిష్టతకు గుత్తా ఎంతో కష్టపడ్డారని అంటున్నారు. హుజూర్నగర్, నాగార్జునసాగర్, మునుగోడు ఉప ఎన్నికల్లో పార్టీ అభ్యర్థుల గెలుపు కోసం కృషి చేశారని, 2018, 2023 అసెంబ్లీ ఎన్నికల్లో పలువురు అభ్యర్థుల గెలుపు కోసం ఆర్థిక సాయం కూడా చేశారని చెబుతున్నారు. ఇటీవల దేవరకొండ నియోజకవర్గానికి చెందిన పలువురు బీఆర్ఎస్ ఎంపీపీలు, జడ్పీటీసీలు, సర్పంచులు కాంగ్రెస్లో చేరేందుకు సిద్ధమైతే వారిని వారించిన విషయాన్ని గుర్తుచేస్తున్నారు. జగదీశ్వర్గానికి హైకమాండ్తలొగ్గి, తన కొడుకుకు టికెట్నిరాకరిస్తుందోననే భయం గుత్తాను వెంటాడుతోంది. దీంతో తాడోపేడో తేల్చుకునేందుకు ఆయన రెడీ అవుతున్నారు. తాజాగా మంగళవారం జరిగిన ప్రెస్మీట్లో హైకమాండ్ఎవరి ఒత్తిళ్లకు తలొగ్గకుండా గెలుపు గుర్రాలకే టికెట్ ఇవ్వాలని కామెంట్చేయడం బీఆర్ఎస్ వర్గాల్లో చర్చనీయాంశంగా మారింది.
