ఈ వారం ఓటీటీలో రిలీజ్ అయ్యే సినిమాలు ఇవే..

ఎలా చంపాడు? 
టైటిల్: ఆర్యన్‌‌
ప్లాట్​ ఫాం: నెట్‌‌ఫ్లిక్స్‌‌
డైరెక్షన్: ప్రవీణ్‌‌ కె
కాస్ట్​: విష్ణు విశాల్‌‌, సెల్వరాఘవన్‌‌, శ్రద్ధా శ్రీనాథ్‌‌, మానస చౌదరి, అవినాష్

టీవీ చానెల్‌‌ స్టూడియోలో యాంకర్‌‌‌‌ నయన (శ్రద్ధా శ్రీనాథ్) ఒక సెలబ్రిటీని ఇంటర్వ్యూ చేస్తుంటుంది. అది లైవ్‌‌ షో కావడంతో అక్కడే ప్రేక్షకులు కూడా ఉంటారు. వాళ్లలో నుంచి ఆత్రేయ (సెల్వ రాఘవన్) బయటికి వచ్చి సెలబ్రిటీ కాలిపై తుపాకీతో కాలుస్తాడు. లైవ్‌‌ ఆపేస్తే అతన్ని చంపేస్తానని బెదిరిస్తాడు. లైవ్‌‌లోనే తను ఒక రచయితనని, జీవితంలో ఫెయిల్‌‌ అయ్యానని చెప్తాడు. వచ్చే ఐదు రోజుల్లో ఐదు హత్యలు చేస్తానని.. ప్రతి హత్యకు గంట ముందు వాళ్ల వివరాలు చెప్తానంటాడు. అంతేకాదు.. ఆ హత్యలను ఎవరూ ఆపలేరని సవాల్‌‌ కూడా విసురుతాడు. ట్విస్ట్ ఏంటంటే.. అలా చెప్పిన వెంటనే తనను తానే కాల్చుకుని చనిపోతాడు. ఈ కేసుని పోలీస్‌‌ ఆఫీసర్‌‌ నంది (విష్ణు విశాల్)కి అప్పగిస్తారు. అతను ఆత్రేయ చెప్పిన ఆ  ఐదుగురు ఎవరు? చనిపోయిన ఆత్రేయ వాళ్లని ఎలా చంపగలడు? అనే విషయాలు తెలుసుకోవడానికి ఇన్వెస్టిగేషన్‌‌ మొదలుపెడతాడు. ఇన్వెస్టిగేషన్‌‌లో నంది ఏం తెలుసుకున్నాడు? వాటిని అడ్డుకునేందుకు అతను ఏం చేశాడు? తెలుసుకోవాలంటే సినిమా చూడాలి. 

కలిసి ఉంటే.. కలదు సుఖం!
టైటిల్: ఆన్ పావమ్ పొల్లతత్తు, ప్లాట్​ ఫాం: జియో హాట్‌‌స్టార్‌‌
డైరెక్షన్: కలైయరసన్ తంగవేల్
కాస్ట్​: రియో ​​రాజ్, మాళవిక మనోజ్, ఆర్జే విఘ్నేష్‌‌కాంత్, షీలా రాజ్‌‌కుమార్

శివ(రియో రాజ్)కి పెద్దలు శక్తి (మాళవిక మనోజ్) అనే అమ్మాయితో పెండ్లి చేస్తారు. శివ ఐటీ ప్రొఫెషనల్‌‌గా పనిచేస్తూ ఇంటి బాధ్యతలు చూసుకుంటాడు. శక్తి హౌస్‌‌వైఫ్‌‌గా ఉంటూ ఇంటిపనులు చక్కబెడుతుంటుంది. ఏ సమస్యా లేకుండా కొన్నాళ్లు జీవితం హాయిగా సాగిపోతుంది. కానీ.. తర్వాత శక్తి చీటికిమాటికి అలగడం, ఇంట్లో పనులు చేయకపోవడం లాంటివి చేస్తుంది. వాళ్ల ఇగోల వల్ల గొడవలు మరింత ముదురుతాయి. దాంతో చివరకు విడాకులు తీసుకోవాలని నిర్ణయించుకుంటారు. ఇద్దరూ కలిసి కోర్టుకు వెళ్తారు. ఆ తర్వాత ఏం జరిగింది? విడాకులు తీసుకున్నారా? మళ్లీ ఒక్కటయ్యారా? సినిమా చూసి తెలుసుకోవాలి. 

ఒకరితో ప్రేమ.. మరొకరితో పెండ్లి
టైటిల్: సన్నీ సంస్కారీ కి 
తులసీ కుమారి
ప్లాట్​ ఫాం: నెట్‌‌ఫ్లిక్స్‌‌
డైరెక్షన్: శశాంక్ ఖైతాన్
కాస్ట్​: వరుణ్ ధావన్, జాన్వీ కపూర్, సన్యా మల్హోత్రా, రోహిత్ సరాఫ్, అక్షయ్ ఒబెరాయ్

సన్నీ సంస్కారి (వరుణ్ ధవన్), అనన్య (సన్య మల్హోత్రా) ఇద్దరూ ప్రేమించుకుంటారు. కానీ.. అనన్య వాళ్ల తల్లిదండ్రుల ఒత్తిడి వల్ల ధనవంతుడైన విక్రమ్ (రోహిత్ సరాఫ్)ను పెండ్లి చేసుకోవడానికి రెడీ అవుతుంది. అందుకోసం సన్నీ లవ్‌‌కి బ్రేకప్ చెప్తుంది. మరోవైపు విక్రమ్‌‌ కూడా తులసీ కుమారి (జాన్వి)ని ప్రేమిస్తాడు. కానీ.. అనన్యతో పెండ్లికి రెడీ అవుతాడు. దాంతో సన్నీ, తులసిలు ఒక్కటై తమ మాజీ లవర్స్‌‌ పెండ్లికి వెళ్తారు. ఆ పెండ్లిని ఎలాగైనా క్యాన్సిల్‌‌ చేసి తాము ప్రేమించినవాళ్లను దక్కించుకోవాలని ప్లాన్‌‌ చేస్తారు. అందుకోసం వాళ్లు ఏం చేశారు. వాళ్ల ప్లాన్ సక్సెస్‌‌ అయ్యిందా? కాలేదా? అనేదే మిగతా కథ.