- ఒకరిని గుర్తించిన పోలీసులు
పద్మారావునగర్, వెలుగు: గాంధీ హాస్పిటల్లో ఓ వ్యక్తి డెడ్బాడీని వదిలేసి పరారైన వారిలో ఒకరిని చిలకలగూడ పోలీసులు గుర్తించారు. ఇన్స్పెక్టర్ నరేశ్ తెలిపిన వివరాల ప్రకారం.. ఈ నెల 10న గచ్చిబౌలిలోని బిల్డింగ్ కన్స్ట్రక్షన్ వద్ద జరిగిన గొడవలో ఓ వ్యక్తి తీవ్రంగా గాయపడ్డాడు. అపస్మారక స్థితిలో ఉన్న అతడిని కొందరు వ్యక్తులు అదే రోజు రాత్రి గాంధీ హాస్పిటల్ ఎమర్జెన్సీ వార్డుకు తీసుకొచ్చారు. డాక్టర్లు పరీక్షించి ఆ వ్యక్తి చనిపోయినట్లు చెప్పారు. దీంతో డెడ్ బాడీని వదిలేసి సదరు వ్యక్తులు పారిపోయారు.
దీని గురించి సమాచారం అందుకున్న పోలీసులు గాంధీ హాస్పిటల్కు చేరుకున్నారు. చనిపోయిన వ్యక్తి చేతిపై జితేందర్ క్రిషి అని హిందీలో రాసిన టాటూను గుర్తించారు. గొడవలో జితేందర్ తీవ్రంగా గాయపడి చనిపోయినట్లు పోలీసులు భావిస్తున్నారు. అయితే, డెడ్బాడీని వదిలేసి పరారైన వారిలో ఒకరిని హాస్పిటల్ సీసీ కెమెరా ఫుటేజ్లో గుర్తించినట్లు ఇన్స్పెక్టర్ నరేశ్ తెలిపారు. ఆ వీడియో ఫుటేజ్ను ఆదివారం రాత్రి ఆయన మీడియాకు రిలీజ్ చేశారు. పూర్తి స్థాయిలో దర్యాప్తు చేస్తున్నట్లు చెప్పారు.
