కోలీవుడ్ స్టార్ హీరో ధనుష్ మేనల్లుడు పవిష్ నారాయణ్ హీరోగా, నాగదుర్గ హీరోయిన్గా నటించిన రొమాంటిక్ డ్రామా 'లవ్ ఓ లవ్'. జూలై 10న తమిళంతో పాటు తెలుగులో విడుదలైన ఈ చిత్రం బాక్సాఫీస్ వద్ద నిరాశపరిచింది. ఆశించిన స్థాయిలో ప్రేక్షకులను మెప్పించలేకపోయింది. ఇప్పుడు ఈ మూవీ ఓటీటీ ద్వారా మరోసారి అదృష్టాన్ని పరీక్షించుకోవడానికి సిద్ధమైంది. థియేటర్లలోకి వచ్చిన 21 రోజుల్లోనే ఈ మూవీ డిజిటల్ ప్లాట్ ఫామ్లోకి ఎంట్రీ ఇచ్చేస్తోంది.
స్ట్రీమింగ్ ఎప్పుడంటే?
ఈ మూవీ జూలై 31 నుంచి అమెజాన్ ప్రైమ్ వీడియోలో స్ట్రీమింగ్ కానుంది. ఈ విషయాన్ని దర్శకుడు సెల్వరాఘవన్ సోషల్ మీడియా వేదికగా అధికారికంగా ప్రకటించారు. తమిళంతో పాటు తెలుగు, మలయాళం, కన్నడ భాషల్లో కూడా సినిమా అందుబాటులోకి రానుంది. ఈ చిత్రానికి మగేష్ రాజేంద్రన్ దర్శకత్వం వహించగా, పవిష్ సరసన తెలంగాణ ఫోక్ సాంగ్స్తో మంచి గుర్తింపు తెచ్చుకున్న యూట్యూబర్, గాయని నాగదుర్గ హీరోయిన్గా నటించింది. ఇప్పటికే 'కలివనం'తో హీరోయిన్గా పరిచయమైన నాగదుర్గకు ఇది తొలి తమిళ చిత్రం. సెల్వరాఘవన్, కేఎస్ రవికుమార్, వనిత విజయకుమార్, రమ్య, అశ్వత్, సౌందర్య, ఆదిత్య కతిర్ తదితరులు కీలక పాత్రలు పోషించారు.
కథ విషయానికి వస్తే..
రఘు (పవిష్) ప్రేమలో పడిన తర్వాత అవంతిక (నాగదుర్గ) కోసం తన సంపాదన మొత్తం ఖర్చు చేస్తాడు. ఖరీదైన గిఫ్టులు, షాపింగ్, ట్రిప్స్ పేరుతో క్రెడిట్ కార్డులు పూర్తిగా ఖాళీ చేసి అప్పుల పాలవుతాడు. చివరకు ఉద్యోగం కూడా కోల్పోయి తీవ్ర ఆర్థిక సంక్షోభంలో చిక్కుకుంటాడు. తన బాధకు కారణం అవంతికేనని భావించిన రఘు, పోలీస్ స్టేషన్లో ఆమెతో బ్రేకప్ చేయాలని నిర్ణయించుకుంటాడు. అయితే అవంతిక అందుకు అంగీకరించదు. దీంతో రఘు నాలుగు నెలలు తాను అనుభవించిన బాధలు, అప్పులు, బాధ్యతలన్నింటినీ ఆమె భుజాలపై వేసే షరతు పెడతాడు. ఆ తర్వాత అవంతిక జీవితం ఎలా మారింది? ప్రేమ కంటే బాధ్యత గొప్పదని ఇద్దరూ గ్రహించారా? చివరకు వారి ప్రేమ గెలిచిందా? అనేదే సినిమా ప్రధాన కథ.
ప్రేమలో భావోద్వేగాలతో పాటు ఆర్థిక బాధ్యతల ప్రాధాన్యాన్ని చూపించే ప్రయత్నం చేశారు దర్శకుడు. అయితే బాక్సాఫీస్ వద్ద నిరాశపరిచింది. థియేటర్లలో మిస్సైన ప్రేక్షకులను ప్రేక్షకులను ఈమూవీ ఓటీటీలో ఎంతవరకు ఆకట్టుకుంటుందో చూడాలి. ముఖ్యంగా యువతకు దగ్గరైన కథాంశం, కుటుంబ విలువలు, రిలేషన్షిప్లో బాధ్యత అనే అంశాలు ఈ సినిమాకు ప్రత్యేక ఆకర్షణగా నిలుస్తాయని చిత్రబృందం ధీమా వ్యక్తం చేస్తోంది.
