Shreyas Iyer: న్యూజిలాండ్ గడ్డపైన 5 మ్యాచ్‌ల టీ20 సిరీస్‌ను 3–2 తేడాతో కైవసం చేసుకున్నప్పటికీ టీమిండియా కెప్టెన్ శ్రేయస్ అయ్యర్ (Shreyas Iyer) అసంతృప్తి వ్యక్తం చేశాడు. సిరీస్ ట్రోఫీ గెలిచామన్న ఆనందం ఉన్నప్పటికీ.. జట్టు బౌలింగ్, ఫీల్డింగ్ ప్రమాణాలు తీవ్ర ఆందోళన కలిగిస్తున్నాయి, తక్షణమే వాటిపై దృష్టి పెట్టకపోతే మున్ముందు భారీ మూల్యం చెల్లించుకోవాల్సి వస్తుందని హెచ్చరించాడు. విదేశీ పర్యటనల్లో విజయాలు సాధించడం శుభపరిణామమే అయినా, చివరి రెండు మ్యాచ్‌ల్లో ఓడిపోవడం జట్టులోని లోపాలను మరోసారి బయటపడిందని శ్రేయస్ కుండబద్దలు కొట్టాడు.
విదేశాల్లో ఆ తేడా కొట్టొచ్చినట్లు కనిపిస్తుంది: శ్రేయస్
పోస్ట్-మ్యాచ్ ప్రెజెంటేషన్‌లో కెప్టెన్ శ్రేయస్ అయ్యర్ మాట్లాడుతూ.. బౌలింగ్, ఫీల్డింగ్ విభాగాల్లో మేము ఇంకా చాలా మెరుగుపడాల్సి ఉంది. మైదానంలో మా ఆటగాళ్లు చేసిన చిన్న చిన్న పొరపాట్లు తీవ్ర నిరాశకు గురిచేశాయి. న్యూజిలాండ్ లాంటి కఠినమైన కండిషన్స్‌లో ఆడేటప్పుడు వెలుతురు, ఫ్లడ్‌లైట్ల వాతావరణం ఇండియా కంటే పూర్తిగా భిన్నంగా ఉంటుంది. బంతిని సరిగ్గా అంచనా వేయడం ఇక్కడ అంత ఈజీ కాదు, కానీ ఈ పర్యటన మాకు ఒక గొప్ప లెర్నింగ్ కర్వ్‌ (నేర్చుకునే అవకాశం) అన్నాడు.
తన కెప్టెన్సీ ప్రయోగాలపై శ్రేయస్ స్పందిస్తూ.. తొలి మూడు మ్యాచ్‌ల్లో వరుస విజయాలు సాధించి సిరీస్‌ను కైవసం చేసుకోవడం జట్టులో ఊపు తెచ్చింది. చివరి రెండు మ్యాచ్‌లలో మేం కొత్త ప్రయోగాలు చేయడానికి, ఆటగాళ్లను మరింత ఛాలెంజ్ చేయడానికి ప్రయత్నించాం.. కానీ ఫీల్డింగ్ విషయంలో మాత్రం చాలా శ్రమించాల్సి ఉందనేది స్పష్టమైందన్నాడు.
సేనా (SENA) దేశాల్లో శ్రేయస్‌కు తొలి సిరీస్ విజయం:
శ్రేయస్ అయ్యర్ కెప్టెన్‌గా బాధ్యతలు చేపట్టిన కొత్తలో ఐర్లాండ్, ఇంగ్లాండ్ పర్యటనల్లో టీమిండియా వరుసగా సిరీస్‌లు కోల్పోయిన విషయం తెలిసిందే. అయితే ఇప్పుడు న్యూజిలాండ్‌ను వారి సొంతగడ్డపై ఓడించి సిరీస్ గెలవడం శ్రేయస్ కెప్టెన్సీ కెరీర్‌లో ఒక మైలురాయిగా నిలిచింది.
కొద్దిలో మ్యాచ్‌లు చేజారాయి: మిచెల్ శాంట్నర్
మరోవైపు న్యూజిలాండ్ కెప్టెన్ మిచెల్ శాంట్నర్ మాట్లాడుతూ.. మొదటి రెండు మూడు మ్యాచ్‌లలో మేం గెలవాల్సిన పొజిషన్‌లో ఉండి కూడా ఓడిపోయాం.. లేదంటే ఈ స్కోరుబోర్డు (3–2) మరోలా ఉండేది. అయితే చివరి రెండు మ్యాచ్‌ల్లో మా బౌలర్లు, బ్యాటర్లు అద్భుతమైన ప్రదర్శన చేశారు అని కివీస్ కెప్టెన్ శాంట్నర్ పేర్కొన్నాడు.
