- అల్ అజీజియా స్టీల్ మిల్ కేసులో నిర్దోషిగా ప్రకటన
ఇస్లామాబాద్: పాకిస్తాన్ ముస్లిం లీగ్ నవాజ్ పార్టీ అధినేత, మాజీ ప్రధాని నవాజ్ షరీఫ్ కు ఇస్లామాబాద్ హైకోర్టు ఊరటనిచ్చింది. అల్ అజీజియా స్టీల్ మిల్ అవినీతి కేసులో మంగళవారం ఆయనను నిర్దోషిగా ప్రకటించింది. ఈ స్టీల్ మిల్లును ప్రముఖ వ్యాపారవేత్త, నవాజ్ షరీఫ్ తండ్రి మహమ్మద్ షరీఫ్ 2001లో సౌదీ అరేబియాలో స్థాపించారు. ఆ సమయంలో నవాజ్ కూడా సౌదీ అరేబియాలో ప్రవాస జీవితం గడుపుతున్నారు. దీంతో పాకిస్తాన్ నుంచి తరలించిన అక్రమ సంపాదనతో ఈ మిల్లును స్థాపించారని నవాజ్ ఆరోపణలు ఎదుర్కొన్నారు.
అయితే, ఈ మిల్లుకు హెడ్ గా నవాజ్ కొడుకు హుస్సేన్ షరీప్ వ్యవహరిస్తున్నారు. అయినప్పటికీ నిర్దోషిత్వాన్ని నిరూపించుకోవడంలో నవాజ్ షరీఫ్ విఫలమయ్యారు. దీంతో యాంటీ కరప్షన్ కోర్టు 2018లో ఏడేళ్ల జైలు శిక్షతో పాటు భారీ జరిమానాను విధించింది. తాజాగా ఇస్లామాబాద్ హైకోర్టు నిర్దోషిగా ప్రకటించడంతో నవాజ్కు జైలు శిక్ష రద్దయింది.
