న్యూఢిల్లీ: సముద్రపు దొంగలు, డ్రోన్ దాడుల నుంచి వాణిజ్య నౌకలకు రక్షణ కల్పించేందుకు నార్త్, సెంట్రల్ అరేబియా నుంచి ఏడెన్ గల్ఫ్ దాకా ఇండియన్ నేవీ 10 వార్షిప్లను మోహరించింది. యుద్ధ నౌకలపై మెరైన్ కమాండోలు విధులు నిర్వహిస్తారు. ఎంవీ కెమ్ ప్లూటోపై పైరేట్ల దాడి నేపథ్యంలో నేవీ ఈ చర్యలు చేపట్టింది. ‘ఆపరేషన్ ప్రాస్పిరిటీ గార్డియన్’ పేరుతో కూటమిని ఏర్పాటు చేసి అమెరికా కూడా పైరేట్ లపై పోరాడుతోంది. అయితే, ఈ కూటమిలో ఇండియా చేరలేదు. కీలకమైన ప్రాంతాల్లో ఇండియన్ నేవీ గస్తీ ముమ్మరం చేసింది. ఎలాంటి డ్రోన్ దాడులైనా తిప్పికొట్టేందుకు సిద్ధంగా ఉన్నామని ఇండియన్ నేవీ ప్రకటించింది. ఐఎన్ఎస్ కోల్కతా, ఐఎన్ఎస్ కొచ్చి, ఐఎన్ఎస్ చెన్నై, ఐఎన్ఎస్ మోర్ముగావ్, ఐఎన్ఎస్ తల్వార్, ఐఎన్ఎస్ తార్కాష్ లాంటి వార్ షిప్లను మోహరించినట్టు తెలిపింది. ఎకనామిక్ జోన్లో నేవీ, కోస్ట్ గార్డ్ నిఘా నిరంతరం ఉంటున్నదని వివరించింది. యుద్ధ నౌకల మోహరింపుతో ఎలాంటి డ్రోన్, సముద్రపు దొంగల దాడులు ఉండవని ధీమా వ్యక్తం చేసింది.
