ప్రైవసీ, సెక్యూరిటీ ఉండటంతో ఇష్టపడుతున్న జనం
రెండేండ్లలో హైదరాబాద్లో 60 ప్రాజెక్టులు
హైదరాబాద్, వెలుగు: కారణమేదైనా కావొచ్చు.. జనం ఓపెన్ ప్లాట్లకు బదులు విల్లా ప్లాట్లంటేనే ఇష్టపడుతున్నారు. భవిష్యత్ కోసం వాటికే ప్రాధాన్యం ఇస్తున్నారు. ఎలాంటి మౌలిక వసతుల్లేని ప్లాట్లను కొనడం కన్నా.. అన్ని సౌలతులండే గేటెడ్ కమ్యూనిటీల్లోని లగ్జరీ విల్లా ప్లాట్లవైపే మొగ్గు చూపుతున్నారు. ప్రైవసీ, సెక్యూరిటీ, క్లియర్ టైటిల్తో పాటు క్లబ్ హౌస్, స్విమ్మింగ్ పూల్ వంటి అదనపు సౌలతులుండడం వల్ల కూడా విల్లా ప్లాట్లకు డిమాండ్ పెరుగుతోంది. జస్ట్ ఏడాదిలోనే విల్లా ప్లాట్ల అమ్మకాలు 40 శాతం పెరిగాయి. దీంతో చిన్నాపెద్ద రియల్ఎస్టేట్ సంస్థలు కూడా ఎక్స్క్లూజివ్గా విల్లా ప్లాట్లను లాంచ్ చేస్తున్నాయి.
సాధారణ ప్లాట్ల కంటే ఎంతో భిన్నం
మామూలు ప్లాట్లతో పోలిస్తే విల్లా ప్లాట్ల ధర ఎక్కువే అయినా.. ఆ ప్లాట్లలో ఇచ్చే సౌలతులూ ఆ ధరకు తగ్గట్టుగానే ఉంటాయి. వీకెండ్లో ఫ్యామిలీ, ఫ్రెండ్స్తో కలిసి సరదాగా గడిపేందుకూ ప్లాట్లలో సౌకర్యాలను అందిస్తున్నారు. ఓపెన్ క్లబ్హౌస్, స్విమ్మింగ్పూల్, పార్టీజోన్, జిమ్, పచ్చదనం వంటి అదనపు హంగులను అద్దుతున్నారు. వీటితోపాటు అండర్ గ్రౌండ్ డ్రైనేజీ, కరెంట్, ఓపెన్ ఏరియా, ప్లాట్ చుట్టూ పచ్చటి చెట్ల వంటి ఏర్పాట్లు చేస్తున్నారు. ఇప్పటికే కొన్ని రియల్ఎస్టేట్ సంస్థలు విల్లా ప్లాట్ కొన్నవారికి రిసార్ట్ క్లబ్ సభ్యత్వాన్నీ ఇచ్చాయి. మరికొన్ని సంస్థలు ఐదారేళ్ల తర్వాత బై బ్యాక్ ఫెసిలిటీ, రెంటల్ఇన్కం వచ్చేలా కమర్షియల్ యాక్టివిటీ వంటి ఆఫర్లు ఇస్తున్నాయి.
ఓఆర్ఆర్ చుట్టూ క్రేజ్
సిటీ చుట్టూ ఉన్న ఔటర్ రింగ్ రోడ్ (ఓఆర్ఆర్)కు 15–20 కిలోమీటర్ల దూరంలోని ప్రాంతాల్లోని స్థలాలు విల్లా ప్లాట్లకు అనుకూలంగా ఉంటున్నాయి. ముఖ్యంగా ఐటీ కారిడార్కు ఆనుకుని ఉన్న మంచిరేవుల, నార్సింగి, శంషాబాద్, బెంగుళూరు హైవే, ముత్తంగి, ఓఆర్ఆర్ గేట్వేల్లో విల్లా ప్లాట్ల నిర్మాణం జోరుగా సాగుతోంది. ప్రస్తుతం మామూలు ప్లాట్లతో పోలిస్తే విల్లా ప్లాట్ల ధరలు గజానికి రూ.10 వేలు ఎక్కువగానే ఉన్నా.. భవిష్యత్ లో ఐదారు రెట్ల ధర వచ్చే అవకాశముందన్న ఆశాభావంతో చాలా మంది విల్లా ప్లాట్ల వైపు మొగ్గుచూపుతున్నారు. ఫ్రీ లాంచింగ్, నిర్మాణ దశలోనే ప్లాట్లకు అడ్వాన్సులూ కట్టేస్తున్నారు. బిల్డర్ల ట్రాక్ రికార్డును బట్టి బ్యాంకర్లు లోన్లు ఇస్తున్నారు. దీంతో చాలా మంది విల్లా ప్లాట్లను కొనేస్తున్నారని రియల్టర్లు చెప్తున్నారు.
గజం రూ. 25 వేలు
ఐటీ ఉద్యోగులు, కొత్తగా పెళ్లైన జంటలు, రిటైర్డ్ ఉద్యోగులు, ఎన్నారైలు విల్లా ప్లాట్లకు ఎక్కువగా మొగ్గు చూపుతున్నారు. దీంతో ఈ రెండేండ్లలోనే హైదారబాద్లో 60కిపైగా విల్లా ఓపెన్ ప్రాజెక్టులు మొదలయ్యాయి. 150 నుంచి 200 ఎకరాల విస్తీర్ణంలో విల్లా ప్లాట్లు అందుబాటులోకి వచ్చాయి. సిటీకి 20 నుంచి 30 కిలోమీటర్ల దూరంలోని మామూలు ప్లాట్ల ధర గజానికి రూ.12 వేల నుంచి రూ.15 వేల దాకా ఉంటుండగా.. ఈ విల్లా ప్లాట్లకు రూ.25 వేల దాకా ఉంటోంది. ఇప్పటికే ఓపెన్ ప్లాట్లు వేసిన రియల్టర్లు.. మిగిలిన భూముల్లో విల్లా ప్లాట్లను నిర్మిస్తున్నారు. బడా కంపెనీలూ వీటిలో ఇన్వెస్ట్ చేస్తున్నాయి. అపార్టుమెంట్లు, లగ్జరీ విల్లాల నిర్వహణ ఖర్చులు ఎక్కువైపోతుండడంతో.. తక్కువ పెట్టుబడులు, ఎక్కువ లాభాలు వస్తున్న ఈ విల్లా ప్రాజెక్టులపై ఆసక్తి చూపిస్తున్నారు. హైదరాబాద్కు చెందిన సంస్థలే కాకుండా ముంబై, ఢిల్లీ, బెంగళూరుకు చెందిన కంపెనీలూ వీటిలో ఇన్వెస్ట్మెంట్లు పెడ్తున్నాయని రియల్ఎస్టేట్ వర్గాలు చెప్తున్నాయి.
