మహబూబ్‌నగర్ : పోలింగ్ ప్రశాంతం

ఈవీఎంల మొరాయింపుతో ఓటర్లకు తప్పని తిప్పలు
జడ్చర్ల, దేవరకద్రలో 11 గంటల తర్వాత అనుహ్యంగా పెరిగిన పోలింగ్
టీఎన్జీవోస్ మాజీ అధ్యక్షుడు రాజేందర్రెడ్డిపై బీఆర్ఎస్ లీడర్ల దాడి
వర్కూరులో పోలింగ్ స్టేషన్లోకి అనుచరులతో వచ్చిన ఎమ్మెల్యే చిట్టెంను అడ్డుకున్న కాంగ్రెస్ లీడర్లు

వెలుగు, నెట్వర్క్ : ఉమ్మడి పాలమూరు జిల్లాలో చెదురుమదురు ఘటనలు మినహా పోలింగ్ ప్రశాంతంగా జరిగాయి. పలు పోలింగ్ స్టేషన్లలో ఈవీఎంలు మొరాయించాయి. దీంతో ఓటర్లు క్యూలో బారులు తీరడంతో కొన్ని సెంటర్ల వద్ద రాత్రి 8 గంటల వరకు పోలింగ్ సాగింది. అనంతరం పోలీసు బందోబస్తు మధ్య ఈవీఎంలను స్ట్రాంగ్ రూమ్లకు తరలించారు. ఎలాంటి అవాంఛనీయ ఘటనలు జరుగకపోవడంతో అధికారులు, పోలీసులు ఊపిరి పీల్చుకున్నారు.

మందకొడిగా ప్రాంరభమై..

ఉదయం ఏడు గంటలకు పోలింగ్ ప్రారంభమైనా 11 గంటల వరకు మందకొడిగా సాగింది. జడ్చర్ల, దేవరదకద్ర నియోజకవర్గాల్లో 11 గంటల తర్వాత ఒక్కసారిగా పోలింగ్ పర్సంటేజీ పెరిగింది. రెండు నియోజకవర్గాల్లో పోలింగ్ ముగిసే సమయానికి 75 శాతం పైగా ఓట్లు పోల్ అయ్యాయి. ఉదయం తొమ్మిది గంటల వరకు నారాయణపేటలో 8 శాతం, మక్తల్లో 9.67 శాతం, మహబూబ్నగర్లో 11.98, జడ్చర్ల 11.50, దేవరకద్రలో 7.10, 11 గంటల వరకు నారాయణపేటలో 21.60, మక్తల్ 24.56, మహబూబ్నగర్లో 24.6, జడ్చర్లలో 23.11, దేవరకద్రలో 19.83, మధ్యాహ్నం ఒంటి గంట వరకు నారాయణపేట 42.90, మక్తల్ 42.31, మహబూబ్నగర్ 42.38, జడ్చర్ల 50.14, దేవరకద్ర 42.78, 3 గంటల వరకు నారాయణపేట 55.4, మక్తల్ 58.86, మహబూబ్నగర్ 57.05, జడ్చర్ల 61.30, దేవరకద్ర 58.62, ఐదు గంటలకు నారాయణపేట 66.13, మక్తల్ 69.21, మహబూబ్నగర్ 69.32, జడ్చర్ల 73.80, దేవరకద్ర 78.32 % పోలింగ్ నమోదైంది.

సతాయించిన ఈవీఎంలు..

దేవరకద్ర, మక్తల్, జడ్చర్ల, కొడంగల్ నియోజవర్గాల్లోని పలు పోలింగ్ స్టేషన్లలో ఈవీఎంలు సతాయించాయి. కొన్ని చోట్ల టెక్నికల్ ప్రాబ్లం వల్ల ఈవీఎంలు స్లోగా రన్ కావడంతో పోలింగ్ టైం ముగిసినా ఎనిమిది గంటల వరకు ఆఫీసర్ల పర్మిషన్తో పోలింగ్ కొనసాగింది.
మద్దూరు మండలంలోని చెన్నారెడ్డిపల్లిలో ఈవీఎం మొరాయించడంతో రాత్రి తొమ్మిది వరకు పోలింగ్ జరిగింది.
నవాబ్పేట మండలం యన్మన్గండ్లలో ఉదయం ఏడు గంటలు ప్రారంభం కావాల్సిన పోలింగ్.. ఈవీఎం మొరాయించడంతో గంట ఆలస్యంగా ప్రారంభమైంది. 8 గంటల వరకు పోలింగ్ సాగింది. లోకిరేవు, కొండాపూర్, కాకర్లపహాడ్ పోలింగ్ స్టేషన్లలో ఈవీఎంలలో నెట్వర్క్ ప్రాబ్లం వల్ల ఆరున్నర వరకు పోలింగ్ సాగింది.
ఊట్కూర్ మండలం పెద్దచెట్టు గ్రామంలోని 19వ పోలింగ్ స్టేషన్లో ఈవీఎం మొరాయించింది. దీంతో రాత్రి ఏడు గంటల వరకు పోలింగ్ సాగింది.
జడ్చర్ల మున్సిపాల్టీలోని 185 పోలింగ్ స్టేషన్ వద్ద ఈవీఎం మొరాయిచింది. దీంతో అరగంట పాటు పోలింగ్ నిలిచిపోయింది. అధికారులు టెక్నికల్ ప్రాబ్లమ్ను సాల్వ్ చేయడంతో తిరిగి పోలింగ్ ప్రారంభమైంది.
దేవరకద్ర మండలం జీనుగురాల గ్రామంలోని 140 పోలింగ్ స్టేషన్లో ఈవీఎం అరగంట పాటు సతాయించడంతో పోలింగ్ నిలిచిపోయింది. ఇదే మండలంలోని గోపన్పల్లిలో 145లో కూడా ఇదే ప్రాబ్లమ్ రావడంతో అక్కడ అరగంట తర్వాత పోలింగ్ తిరిగి ప్రారంభమైంది.
చిన్నచింతకుంట మండల కేంద్రంలో 221 పోలింగ్ స్టేషన్లో ఈవీఎం రెండు సార్లు మొరాయించింది. దీంతో పోలింగ్ ఆలస్యమైంది.
అడ్డాకుల మండలం బలీదుపల్లి గ్రామంలో ఒకే పోలింగ్ స్టేషన్ను ఏర్పాటు చేయడం వల్ల ఓటర్లు ఇబ్బంది పడ్డారు. దాదాపు రాత్రి ఏడున్నర గంటల వరకు పోలింగ్ సాగింది. 1,136 ఓటకు గాను 940 ఓట్లు పోలయ్యాయి.
గద్వాల జిల్లా మానవపాడు మండలం అమరవాయి, గట్టు మండలం గొర్లఖాన్ దొడ్డి, గద్వాల పట్టణం, మల్దకల్ మండలం పెద్దోడి విలేజ్ లో ఈవీఎంలు మొరాయించడంతో పోలింగ్ ఆలస్యమైంది. ధరూర్ మండలం గుడ్డందొడ్డి విలేజ్లో బీజేపీ కార్యకర్త రమేశ్ పై కాంగ్రెస్ కార్యకర్తలు దాడి చేశారు.
వనపర్తి జిల్లా పాన్గల్ మండలం అన్నారంలో ఈవీఎంలు మొరాయించగా, ఖిల్లా ఘణపురం, పెద్దమందడి మండలంలోని పలు గ్రామాల్లో ఓటర్లకు డబ్బు పంచుతున్నారన్న ప్రచారం జరగడంతో కాంగ్రెస్, బీఆర్ఎస్ వర్గాల మధ్య ఘర్షణ వాతావరణం నెలకొంది.

నిరసనలు.. దాడులు

నారాయణపేట జిల్లా మక్తల్ నియోజకవర్గం మాగనూర్ మండలం వర్కూరు గ్రామంలో బీఆర్ఎస్ క్యాండిడేట్, ఎమ్మెల్యే చిట్టెం రామోహన్రెడ్డిపై కాంగ్రెస్ కార్యకర్తలు తిరగబడ్డారు. 59, 60వ పోలింగ్ స్టేషన్లోకి ఎమ్మెల్యే తనతో పాటు మరో 14 మంది బీఆర్ఎస్ లీడర్లను తీసుకొచ్చారు. ఇందుకు కాంగ్రెస్ లీడర్లు అడ్డు చెప్పడంతో ఉద్రిక్త పరిస్థితి నెలకొంది. ఎమ్మెల్యే, ఆయన వాహనంపై దాడి చేసే ప్రయత్నం చేయగా, అక్కడే ఉన్న పోలీసులు, గన్మెన్లు ఎమ్మెల్యేను అక్కడి నుంచి పంపించారు.

ఆయన కారులో వెళ్తుండగా వెంబడించారు.మహబూబ్నగర్ నియోజకవర్గ కేంద్రంలోని శ్రీనివాస్కాలనీలో ఉన్న 100, 101 పోలింగ్ స్టేషన్ల వద్ద టీఎన్జీవోస్ మాజీ అధ్యక్షుడురాజేందర్ రెడ్డిపై బీఆర్ఎస్ లీడర్లు దాడి చేశారు. తనపై బీఆర్ఎస్ అభ్యర్థి, మంత్రి వి.శ్రీనివాస్ గౌడ్ ఆదేశాలతో మహేశ్గౌడ్ తో పాటు మరికొందరు దాడి చేశారని రూరల్పోలీస్ స్టేషన్లో కంప్లైంట్ చేశారు.