1, 2 యూనిట్లను ప్రారంభించిన మంత్రి జగదీశ్రెడ్డి
అమ్రాబాద్, వెలుగు: శ్రీశైలం ఎడమగట్టు భూగర్భ జల విద్యుత్ కేంద్రంలోని 1, 2వ యూనిట్లను సోమవారం మంత్రి జగదీశ్రెడ్డి ప్రారంభించారు. అంతకుముందు మొదటి, రెండవ యూనిట్లను మంత్రి, ట్రాన్స్ కో సీఎండీ ప్రభాకర్పరిశీలించారు. విజయదశమి సందర్భంగా ప్లాంట్ లో ఏర్పాటు చేసిన దుర్గామాత విగ్రహానికి ప్రత్యేక పూజలు చేశారు. అనంతరం 1, 2 యూనిట్లను బటన్ నొక్కి మంత్రి ప్రారంభించారు. రెండు యూనిట్ల ద్వారా 300 మెగావాట్ల కరెంట్అందుబాటులోకి వస్తుందని అంచనా. అనంతరం మంత్రి జగదీశ్ రెడ్డి మాట్లాడుతూ ఆగస్టు 20న బ్యాటరీలను మారుస్తుండగా జరిగిన అగ్నిప్రమాదం కారణంగా ఏడుగురు సిబ్బంది, ఇద్దరు ప్రైవేట్వ్యక్తులు మరణించారని అన్నారు. ప్రమాదంలో నాలుగో ప్లాంటు పూర్తిగా కాలిపోగా 1, 2, 3, 5, 6 యూనిట్లు దెబ్బతిన్నాయన్నారు. ఇంజనీర్లు, ఇతర సిబ్బంది నిరంతరం మరమ్మతులు కొనసాగించడంతో రెండు నెలల్లోనే రెండు యూనిట్లు అందుబాటులోకి వచ్చాయన్నారు. 3, 5, 6 యూనిట్లను కూడా త్వరలోనే ప్రారంభించనున్నట్లు చెప్పారు. ప్రమాదంలో 4వ యూనిట్ కు అధిక నష్టం వాటిల్లిందని, దానిని వచ్చే ఏడాది మే నెలలోపు అందుబాటులోకి తెచ్చేలా చూస్తామన్నారు. అన్ని యూనిట్లలో నష్టం దాదాపు రూ.100 కోట్లలోపే ఉండే అవకాశం ఉందని వివరించారు. 4 వ యూనిట్ పూర్తిగా దెబ్బతినడంతో దానికి కొంత ఎక్కువ ఖర్చు కావొచ్చని, 1, 2 యూనిట్లలో వాటిల్లిన నష్టం కేవలం రూ. 1 కోటి లోపేనని తెలిపారు.
ప్రెస్కు నో పర్మిషన్
శ్రీశైలం విద్యుత్ ప్లాంట్ యూనిట్ల ప్రారంభకార్యక్రమానికి అధికారులు ప్రెస్ను అనుమతించలేదు. మంత్రి పర్యటనలో ప్రెస్ను అనుమతిస్తే ప్లాంట్లో ప్రమాదానికి కారణాలపై ఏర్పాటైన నిపుణుల కమిటీ, సీఐడీ విచారణలో ఏం తేలిందో ప్రశ్నించే అవకాశం ఉండడంతో ప్రింట్, ఎలక్ట్రానిక్ మీడియాకు అనుమతి ఇవ్వకుండా గేట్వద్దే నిలిపేశారు. మంత్రి ప్రోగ్రామ్అయిపోగానే కాంపౌండ్లోకి అనుమతించారు.
