కామేపల్లి, వెలుగు : సీతారామ ప్రాజెక్టు కాలువల కింద భూములు కోల్పోయే రైతులకు మెరుగైన నష్టపరిహారం అందిస్తామని, భూసేకరణ సర్వేకు సహకరించాలని సీతారామ ప్రాజెక్టు స్పెషల్ డిప్యూటీ కలెక్టర్ సదానందం కోరారు. బుధవారం కొమ్మినేపల్లి జీపీ ఆఫీస్లో కొండాయిగూడెం, కొమ్మినేపల్లి రెవెన్యూ గ్రామాల రైతులతో నిర్వహించిన అవగాహన సభలో ఆయన మాట్లాడారు. రూ.2 వేల కోట్లతో చేపడుతున్న ఈ ప్రాజెక్టు ద్వారా 10 వేల ఎకరాలకు గోదావరి జలాలు అందనున్నాయని తెలిపారు. భూమి విలువకు అదనంగా మూడు రెట్లు పరిహారం చెల్లించడంతో పాటు, భూమిపై ఉన్న ఆస్తులకు కూడా నష్టపరిహారం అందిస్తామని చెప్పారు.
