సిద్దిపేట అభివృద్ధి చూసినప్పటి నుంచి మంత్రి హరీశ్రావుకి తాను ఫ్యాన్ అయ్యానని దర్శకధీరుడు రాజమౌళి అన్నారు. బంజారాహిల్స్ లో లిటిల్ స్టార్స్ అండ్ షీ ప్రైవేటు ఆస్పత్రి ప్రారంభోత్సవానికి చీఫ్ గెస్ట్గా హాజరైన ఆయన మాట్లాడుతూ.. సిద్దిపేటలో గతంలో చూసినప్పటికీ ఇప్పటికీ చాలా అభివృద్ధి జరిగిందని కొనియాడారు. నియోజకవర్గ అభివృద్ధిలో మంత్రి హరీశ్రావు కృషి తెలిశాక.. తాను మంత్రి అభిమానిగా మారానని చెప్పారు. రాష్ట్రాభివృద్ధికి సీఎం కేసీఆర్ సైతం నిరంతరం కృషి చేస్తున్నారని పేర్కొన్నారు.
తెలుగు జాతి ఖ్యాతిని ఆకాశానికెత్తిన రాజమౌళి..
ఆసుపత్రి ప్రారంభోత్సవంలో పాల్గొన్న మంత్రి హరీశ్ రావు మాట్లాడుతూ.. బాహుబలితో తెలుగు సినిమాను దేశ వ్యాప్తం చేస్తే.. ఆర్ఆర్ఆర్తో విశ్వవ్యాప్తం చేశారని పేర్కొన్నారు. ఆర్ఆర్ఆర్ సినిమా ఆస్కార్ సాధించడం పట్ల ఆనందం వ్యక్తం చేస్తూ.. రాజమౌళిని మంత్రి సత్కరించారు. భవిష్యత్తులో కూడా మరిన్ని మంచి సినిమాలు తీసి, విజయాలు అందుకోవాలని ఆకాంక్షించారు.