న్యూఢిల్లీ: భారత శాటిలైట్ నెట్ రంగానికి సంబంధించి ఎలాన్ మస్క్ చేసిన వ్యాఖ్యలపై రిలయన్స్ స్పందించింది. స్టార్లింక్తో సహా ఎవరితోనైనా పోటీకి తాము సిద్ధమేనని, అయితే దేశంలో వ్యాపారం చేయాలంటే భారత చట్టాలను ప్రతి ఒక్కరూ పాటించాల్సిందేనని స్పష్టం చేసింది. "రిలయన్స్ ఎప్పుడూ పోటీకి భయపడలేదు. వినియోగదారులకు ఎవరు మెరుగైన సేవలందిస్తారో ఈ పోటీ తేలుస్తుంది" అని పేర్కొంది. 2016లో ప్రారంభమైన జియో, నేడు 53 కోట్ల మంది నమ్మకాన్ని గెలుచుకుందని గుర్తుచేసింది.
దేశీయ, విదేశీ సంస్థలనే తేడా లేకుండా అందరికీ చట్టాలు సమానమని, జియో శాటిలైట్ సేవలు కూడా అనుమతుల కోసమే వేచిచూస్తున్నాయని తెలిపింది. గుత్తాధిపత్యం కోసం స్టార్‌‌‌‌లింక్‌‌‌‌ను అడ్డుకుంటున్నారన్న మస్క్ ఆరోపణలను ప్రభుత్వం ఇప్పటికే తోసిపుచ్చింది. జియో, వన్‌‌‌‌వెబ్, స్టార్‌‌‌‌లింక్.. ఏ సంస్థ అయినా భద్రతా నిబంధనలు పాటించాల్సిందేనని స్పష్టం చేసింది. ఈ వివాదం వేళ జియో ప్లాట్‌‌‌‌ఫామ్స్ రూ.30,213 కోట్ల భారీ ఐపీఓకు సిద్ధమవుతుండటం గమనార్హం.
