రూ.25వేలు అప్పు చేసి మరీ అప్లికేషన్
మధ్యప్రదేశ్లోని శివ్పురిలో ఘటన
శివ్పురి(మధ్యప్రదేశ్): ప్రధాన్ మంత్రి ఆవాస్ యోజన(పీఎంఏవై)లో జరిగిన అవకతవకలపై ఓ ఆర్టీఐ కార్యకర్త 9,000 పేజీల ఇన్ఫర్మేషన్ పొందాడు. దీని కోసం అతను ఏకంగా రూ.25వేలు అప్పు చేశాడు. 9వేల పేజీలు తీసుకునేందుకు ఎండ్లబండిపై డ్రమ్స్ వాయించుకుంటూ మున్సిపల్ ఆఫీస్కు వెళ్లాడు. దీనికి సంబంధించిన వీడియో సోషల్ మీడియాలో వైరల్ అవుతున్నది.
మధ్యప్రదేశ్, శివ్పురి జిల్లాలోని బైరాద్ టౌన్కు చెందిన మఖన్ ధాకడ్ ఆర్టీఐ యాక్టివిస్ట్. పీఎంఏవై స్కీంలో అవినీతి జరిగినట్టు తెలుసుకున్నాడు. స్కీంకు సంబంధించిన సమాచారం కోసం 2 నెలల కింద ఆర్టీఐ చట్టం కింద దరఖాస్తు చేసుకున్నాడు. రూ.25 వేలు కడితేనే ఇన్ఫర్మేషన్ ఇస్తామని మున్సిపల్ అధికారులు చెప్పారు. అప్పు తెచ్చి మరీ రూ.25వేలు కట్టాడు. అయినా అధికారులు సతాయించారు.
దీంతో ధాకడ్, డైరెక్ట్గా గ్వాలియర్లోని అర్బన్ అడ్మినిస్ట్రేషన్ డిపార్ట్మెంట్ అధికారులను కలిశాడు. వెంటనే ధాకడ్ అడిగిన ఇన్ఫర్మేషన్ ఇవ్వాలంటూ మున్సిపల్ అధికారులకు ఆదేశాలు వెళ్లాయి. అప్పుడు గానీ మఖన్కు 9,000 పేజీల ఇన్ఫర్మేషన్ లభించలేదు.
