కీవ్‌: రష్యా- శనివారం రాత్రే 28 డ్రోన్‌‌లు, మూడు క్రూయిజ్‌ క్షిపణులతో విరుచుకుపడినట్లు ఉక్రెయిన్ ఆరోపించింది. అందులో 21 డ్రోన్లను ధ్వంసం చేసినట్లు ఆ దేశ ఎయిర్ఫోర్స్ అధికారిక టెలిగ్రామ్‌ చానెల్‌‌లో పోస్టు చేసింది. రష్యా ప్రధానంగా తూర్పు, దక్షిణ ఉక్రెయిన్ ప్రాంతాలపై దృష్టి సారిస్తున్నట్లు తెలిపింది.
‘‘శత్రువులు దాడి వ్యూహాన్ని మార్చారు. ఖేర్సన్‌, నిప్రోపెట్రోవ్స్క్‌ ప్రాంతాలపై ఎక్కువగా దృష్టి సారిస్తున్నారు’’ అని ఉక్రెయిన్ ఎయిర్ఫోర్స్ అధికార ప్రతినిధి తెలిపారు. శత్రు డ్రోన్లను చిన్నపాటి ఆయుధాలతోనే కీవ్‌ సేనలు ధ్వంసం చేశాయని ఆయన పేర్కొన్నారు. తాజా దాడుల్లో ఎలాంటి ప్రాణ నష్టం జరగలేదని కీవ్‌ తెలిపింది. ఉక్రెయిన్ వ్యాఖ్యలపై రష్యా ఇప్పటి వరకు ఎలాంటి ప్రకటన చేయలేదు.
