హైదరాబాద్, వెలుగు: ప్రభాస్‌ హీరోగా నటించిన సలార్ మూవీ చూద్దామని వెళ్లే ఫ్యామిలీలకు నిరాశ ఎదురవుతున్నది. పిల్లలతో మల్టీప్లెక్సులకు వెళ్తున్న వారిని సిబ్బంది అనుమతించట్లేదు. సలార్ ‘ఏ’ సర్టిఫికెట్ మూవీ అని, 18 ఏండ్లకు లోబడిన వారిని అనుమతించేది లేదని నిర్వాహకులు చెబుతుండటంతో ఫ్యామిలీతో వచ్చిన ప్రేక్షకులు ఆగ్రహం వ్యక్తం చేస్తున్నారు. నిర్వాహకులతో వాగ్వాదానికి దిగుతున్నారు. గతంలో చాలా ‘ఏ’సర్టిఫికెట్ సినిమాలకు పిల్లలతో వెళ్లామని, ఈ సినిమాకే ఎందుకు అనుమతించడం లేదని ప్రేక్షకులు ప్రశ్నిస్తున్నారు.
చాలా థియేటర్లలో మైనర్లను అనుమతిస్తున్నారని, మల్టీప్లెక్సుల్లోనే ఇబ్బందులు ఎదురవుతున్నాయని చెబుతున్నారు. రాష్ట్రంలో రెండ్రోజుల నుంచి ఇలాంటి ఘటనలు జరుగుతున్నాయి. సోమవారం ఉప్పల్ డీఎస్‌‌ఎల్ మాల్‌‌లో పిల్లలతో సినిమా చూడడానికి వచ్చిన ఓ మహిళ, కాచిగూడలోని ఓ థియేటర్‌ నిర్వాహకులతో వారు వాగ్వాదానికి దిగారు. కాగా, కొన్ని థియేటర్లు అమౌంట్‌‌ను రీఫండ్ చేస్తుండగా, మరికొన్ని చేయట్లేదు. దీంతో ఒక్క టికెట్‌‌ను రూ.400లకు పైగా పెట్టి కొనుగోలు చేసిన ఫ్యామిలీ ప్రేక్షకులు నష్టపోతున్నారు.
