హైదరాబాద్, వెలుగు: పెండింగ్లో ఉన్న బిల్లులను వెంటనే చెల్లించాలని మంత్రి ఎర్రబల్లి దయాకర్ రావును సర్పంచ్ సంఘం నేతలు కోరారు. గురువారం రాష్ట్ర సర్పంచుల సంక్షేమ సంఘం గౌరవాధ్యక్షుడు సౌదని భూమన్న యాదవ్, అధ్యక్షుడు గూడూరు లక్ష్మీనరసింహ రెడ్డి, ప్రధాన కార్యదర్శి ప్రనీల్ చందర్ మంత్రితో భేటీ అయ్యారు. ఊర్లలో వీధి లైట్ల నిర్వహణ ప్రైవేటుకు అప్పగించొద్దని, ఉపాధి హామీ నిధుల నుంచి పంచాయతీలకు రావాల్సిన బిల్లులు వచ్చేలా చూడాలని కోరారు. చెక్కులపై సంతకాలు చేయకుండా ఇబ్బంది పెడ్తున్న ఉపసర్పంచ్లపై చర్యలు తీస్కోవాలని కోరారు. కేంద్ర నుంచి ఉపాధి హామీ నిధులు రూ. 1,140 కోట్ల బకాయిలు ఉన్నాయని, వాటిని విడుదల చేసేలా చర్యలు తీసుకుంటామని మంత్రి హామీ ఇచ్చారు. హెల్త్ కార్డుల అంశాన్ని సీఎం దృష్టికి తీసుకెళ్తామన్నారు.
