ఇల్లు కట్టాలంటే.. ఇటుకలు కావాలి. అయితే ఆ ఇటుకలు కోయడానికి, కాల్చడానికి, బట్టీ పేర్చడానికి...చాలామంది కూలీలు అవసరం అవుతారు. ఫలితంగా కన్స్ట్రక్షన్ ఖర్చు పెరిగిపోతోంది. దాన్ని తగ్గించడానికే ఎస్ఎన్పిసి ప్రైవేట్ లిమిటెడ్ పేరుతో ఆటోమేటెడ్ ఇటుకల తయారీ మెషిన్ తయారుచేశాడు 42 ఏండ్ల సతీష్. ఇతనికి ఇంజినీరింగ్ పట్టా లేదు. అలాగని మెషిన్ల తయారీలో ఎలాంటి ఎక్స్పీరియెన్స్ లేదు. కానీ, అవసరం ఈ స్కూల్ డ్రాపవుట్ని ఈ ఇన్నొవేషన్ వైపు నడిపించింది. ఎన్నో ఫెయిల్యూ ర్స్ని దాటి ఈ మెషిన్ని మార్కెట్లోకి తీసుకొచ్చిన ఇతని గురించి..
ఇంటికి వెన్నెముక ఇటుకనే. అయితే ఆ ఇటుకల తయారీ చాలా ఖర్చుతో కూడుకున్న పని. దాన్ని తగ్గించడానికే ఈ మెషిన్ తయారుచేశా అంటున్న సతీష్ హర్యానాలోని సోనేపట్లో పుట్టి, పెరిగాడు. పదో క్లాస్ మధ్యలోనే ఆపేసి తండ్రి ఇటుక బట్టీల్ని చూసుకోవాల్సి వచ్చింది. మొదట్లో అంతా బాగానే ఉన్నా రానురాను కూలీల ఖర్చు బాగా పెరిగింది. దాంతో డిమాండ్కి తగ్గట్టు ఇటుకల్ని సప్లయ్ చేయడం కష్టమైంది సతీష్కి. నష్టాల వల్ల 2010లో ఆ బిజినెస్ మూసేశాడు.
కారణాల్ని వెతికాడు
అప్పటికి సతీష్ వయసు 32 ఏండ్లు. చేతిలో మరో పని లేదు. అయినా కుంగిపోలేదు. తన ఫెయిల్యూర్కి కారణాల్ని వెతికాడు. వాటిని ఎలా సరిచేసుకోవాలో ఆలోచించాడు. కూలీలు లేకుండా ఇటుకలు తయారుచేసే మెషిన్ని తీసుకొస్తే ఖర్చుతో పాటు టైం కలిసొస్తుంది అనుకున్నాడు. కానీ, ఎలా? అన్నది తెలియలేదు. అలాగని ఆ ఆలోచనని వదిలేయలేదు. చాలామంది ఇంజినీర్లని కలిశాడు. నాలుగేండ్లు రీసెర్చ్ చేసి, మెషిన్ ప్రొటో టైప్ తయారుచేశాడు. ఎక్స్పర్ట్స్ సజెషన్స్తో దానిలోని లోపాల్ని సరిచేసి, టెస్టింగ్ కోసం ఇటుక బట్టీల్లో పెట్టాడు. ఇటుకల్ని తయారుచేయడం వరకు బాగానే ఉంది. కానీ, తయారైన ఇటుకల్ని మరోచోట ఎండలో ఆరబెట్టాల్సి వస్తోంది. అప్పుడు పెద్ద సంఖ్యలో కూలీల అవసరం పడుతోంది. ఈ సమస్యకు పరిష్కారం ఏంటా? అని ఆలోచించాడు సతీష్.
కదిలే మెషిన్ తయారుచేసి..
ఆ సమస్యకి సొల్యూషన్గా ట్రక్లా కదులుతూ ఇటుకల్ని నేలపై పేర్చే మెషిన్ తయారు చేయాలనుకున్నాడు. అందుకోసం స్టీల్ ఫ్యాక్టరీల్లో పనిచేసే వెల్డర్స్ని , లోకల్గా ఉండే మెకానిక్లని కలిశాడు. వాళ్ల సలహాలతో బ్రిక్ తయారీ యూనిట్ ప్రొటో టైప్ని డిజైన్ చేశాడు. కొందరు వెండర్స్ని కలిసి మెషిన్ తయారీకి కావాల్సిన భాగాల్ని తెప్పించుకున్నాడు. అలా ఏడాది కష్టపడి 2015 లో కదిలే ఇటుకల తయారీ ట్రక్ని లాంచ్ చేశాడు. మొదట గంటకి తొమ్మిదివేల ఇటుకల్ని తయారుచేసే చిన్న మెషిన్ తయారుచేశాడు సతీష్. ఆ తర్వాత ఇటుకల తయారీ కెపాసిటీని పెంచడానికి మెషిన్ పనిముట్లని అప్డేట్ చేసి మరో రెండు వెర్షన్లని రిలీజ్ చేశాడు. అవి కూడా సక్సెస్ అయ్యాయి. కిందటి ఏడాది ‘ కన్స్ట్రక్షన్ డెవలప్మెంట్ మానిటరింగ్ సర్వీసెస్’ కేటగిరిలో ఈ ఇన్నొవేషన్కి నేషనల్ స్టార్టప్ అవార్డు వచ్చింది.
‘‘ఈ బ్రిక్ మెషిన్ ట్రక్కులో జనరేటర్ ఉంటుంది. ఇటుకల తయారీ కోసం మట్టిని కలిపేందుకు, కలిపిన మట్టిని ఇటుకలుగా వేసే అచ్చు మెషిన్స్ ఉంటాయి. దాంతో ట్రక్కులో ఇటుకల తయారీకి కావాల్సిన ముడిసరుకు వేస్తే.. ఇటుకలు తయారవుతాయి. డ్రైవర్ ఆ ట్రక్కు నడుపుతుంటే మెషిన్ ఇటుకల్ని అంగుళం గ్యాప్తో నేలపై వరుసగా పేర్చుతుంది. ఒక్కో ట్రక్కు గంటకి 12, 000 ఇటుకల్ని తయారుచేస్తుంది. దీనివల్ల ఇటుకల తయారీ ఖర్చు అరవైశాతం తగ్గుతుంది. ఇప్పటికే 250 మెషిన్లు ఇతర దేశాలకు పంపించాం. ప్రస్తుతం మెషిన్ తయారీ యూనిట్ని మరింత విస్తరించాలనుకుంటున్నాం. ఈ మెషిన్ తయారీ వెనక మా తమ్ముడు విలాస్ చికారా కృషి కూడా చాలా ఉంద’’ని చెప్పాడు సతీష్.
