- కాంగ్రెస్లో రెడ్లకో న్యాయం బహుజనులకో న్యాయమా?
- అద్దంకి దయాకర్ పై కోమటిరెడ్డి వెంకట్రెడ్డి మాటలు సహించం
- జాతీయ మాల మహానాడు, బీసీ సంక్షేమ సంఘం నాయకులు
ఖైరతాబాద్, వెలుగు: కాంగ్రెస్పార్టీలో రెడ్డిలకు ఒక న్యాయం, ఎస్సీ, ఎస్టీ, బీసీలకో న్యాయమా అని -జాతీయ మాల మహానాడు, బీసీ సంక్షేమ సంఘాల నాయకులు ప్రశ్నించారు. మాలమహానాడు జాతీయ అధ్యక్షుడు, టీపీసీసీ అధికార ప్రతినిధి అద్దంకి దయాకర్ క్షమాపణలు చెప్పినప్పటికీ.. దళితుడనే అక్కసుతో చెంపలు వాయించాలే, పార్టీ నుంచి శాశ్వతంగా బహిష్కరించాలంటూ ఎంపీ కోమటిరెడ్డి వెంకట్రెడ్డి మాట్లాడడం సిగ్గుచేటు అన్నారు. వెంకట్ రెడ్డి వ్యాఖ్యలు దళితులను అవమానించేలా ఉన్నాయన్నారు.
మంగళవారం సోమాజిగూడ ప్రెస్ క్లబ్లో మాలమహానాడు జాతీయ కార్యదర్శి బైరి రమేశ్ అధ్యక్షతన ప్రెస్మీట్పెట్టారు. మాలమహానాడు రాష్ట్ర అధ్యక్షుడు పిల్లి సుధాకర్, బీసీ సంక్షేమ సంఘం రాష్ట్ర అధ్యక్షుడు మేకపోతుల నరేందర్ గౌడ్ పాల్గొని మాట్లాడారు. ఉన్నది ఉన్నట్లు మాట్లాడితే అద్దంకి దయాకర్ కు ఎందుకు షోకాజ్నోటీసులు పంపుతున్నారని మండిపడ్డారు. రెడ్డిలు.. రెడ్డిలు తిట్టుకున్నా, రెడ్డిలు కింది కులాల వారిని తిట్టినా, కొట్టినా నోటీసులు ఇవ్వక పోవడం దుర్మార్గం అన్నారు. తెలంగాణ ఇచ్చిన కృతజ్ఞతతో కాంగ్రెస్లో పనిచేస్తుంటే పొమ్మనలేక పొగ పెట్టినట్లు ఉద్యమకారులకు అవమానం జరుగుతోందన్నారు. ఆత్మగౌరవం లేనిచోట ఉండొద్దని దయాకర్కు సూచించారు.
వెంకట్రెడ్డిపై అట్రాసిటీ కేసు నమోదు చేయాలన్నారు. ఉద్యమనేత అద్దంకి దయాకర్ జోలికొస్తే ఎవరినీ వదలమని హెచ్చరించారు. సమావేశంలో అంబేద్కర్ విగ్రహ పరిరక్షణ కమిటీ అధ్యక్షుడు గుడిమల్ల వినోద్ కుమార్, నాయకులు లింగస్వామి, రామ్ కుమార్, ప్రదీప్, మల్లేష్, భిక్షపతి తదితరులు పాల్గొన్నారు.
