10 కోట్లకు 8 ప్రాపర్టీలను మార్టగేజ్ పెట్టిన సోనూసూద్
న్యూఢిల్లీ: లాక్డౌన్ టైమ్ లో పేదలు, వలస కార్మికులను ఆదుకున్న యాక్టర్ సోనూసూద్ తన ఆస్తులను తాకట్టు పెట్టినట్టు తెలిసింది. అవసరంలో ఉన్న ఆ నిరుపేదలకు హెల్ప్ చేయడానికి ముంబై జుహూలోని తన 8 ప్రాపర్టీలను రూ. 10 కోట్లకు మార్టగేజ్ చేసినట్టు ఓ వార్త బయటకొచ్చింది. తన రెండు షాపులు, ఆరు ఫ్లాట్లను సోనూ తాకట్టు పెట్టి అప్పు తీసుకున్నారని.. దీనికి సంబంధించి సెప్టెంబర్ 15న అగ్రిమెంట్లపై ఆయన సంతకం చేయగా నవంబర్ 24న రిజిస్ట్రేషన్ పూర్తి అయిందని సమాచారం. ఈ విషయాన్ని జేఎల్ఎల్ ఇండియా రెసిడెన్షియల్ సర్వీసెస్ సీనియర్ డైరెక్టర్ రితేశ్ మెహతా చెప్పారని మనీ కంట్రోల్ అనే వెబ్సైట్ వార్త రాసుకొచ్చింది. ‘పక్క వాళ్ల కోసం ఇలాంటి పని చేసిన వాళ్లను నేను చూడలేదు. సోనూ తాకట్టు పెట్టిన వాటిలో తనవి, తన భార్యవి కూడా ఉన్నాయి. వాటిపై వచ్చే రెంట్ వాళ్లకే చెందుతుంది. అయితే రూ. 10 కోట్ల లోన్, వడ్డీని సోనూ చెల్లించాల్సి ఉంటుంది’ అని మనీకంట్రోల్ చెప్పింది.