- బాపూరావు ఢిల్లీ పర్యటన తర్వాత మారిన సీన్.. తాజాగా అమిత్ షా మీటింగ్కు ఎంపీ డుమ్మా
- నల్గొండలో కారు దిగేందుకు సిద్ధమైన గుత్తా సుఖేందర్రెడ్డి.. సీఎం అడ్వైజర్ వేం నరేందర్రెడ్డితో అమిత్ భేటీ
- ఆదిలాబాద్, భువనగిరి టికెట్లపై క్లారిటీ కోసం నేతల ఎదురుచూపులు
ఆదిలాబాద్, వెలుగు : ఆదిలాబాద్ సిట్టింగ్ ఎంపీ సోయం బాపురావు కాంగ్రెస్లో చేరేందుకు సిద్ధమయ్యారు. కొన్నాళ్లుగా ఇంటిపోరు, సీనియర్లతో విభేదాలతో సతమతమవుతున్నప్పటికీ తనకే టికెట్వస్తుందన్న ధీమాలో ఉన్న సోయం బాపూరావు ఇటీవల తరుచూ ఢిల్లీ వెళ్లి బీజేపీ పెద్దలను కలిసివస్తున్నారు. సోమవారం కూడా ఢిల్లీ వెళ్లి కమలం పార్టీలోని అగ్రనేతలను కలిసిన సోయం బాపూరావుకు టికెట్పై హామీ దక్కలేదని తెలుస్తోంది. దీనికితోడు అనూహ్యంగా బీఆర్ఎస్ నేత, మాజీ ఎంపీ గొడం నగేశ్ బీజేపీలో చేరడంతో డైలమాలో పడిన బాపురావు కాంగ్రెస్ నేతలతో టచ్లోకి వెళ్లినట్లు తెలిసింది. ఈ క్రమంలోనే మంగళవారం హైదరాబాద్ లో జరిగిన కేంద్ర హోం శాఖ మంత్రి అమిత్ షా మీటింగ్కు డుమ్మా కొట్టడం గమనార్హం.
కాంగ్రెస్ నేతలతో మంతనాలు..
బీజేపీ టికెట్ రాదని స్పష్టమైన సంకేతాలు రావడంతో సోయం హైదరాబాద్ కేంద్రంగా కాంగ్రెస్ ముఖ్య నేతలతో చర్చలు జరుపుతున్నట్లు తెలిసింది. ఆదిలాబాద్ టికెట్ కేటాయిస్తే కాంగ్రెస్లో చేరేందుకు సంసిద్ధత వ్యక్తం చేసినట్లు తెలిసింది. ఆదివాసీల్లో బలమైన నేతగా సోయంకు గుర్తింపు ఉంది. ఒకవేళ బీజేపీ సోయంకు బదులు ఆదివాసీ తెగకే చెందిన నగేశ్కు టికెట్ ఇస్తే కాంగ్రెస్ కూడా అదే వ్యూహంతో సోయంను బరిలోకి దించే అవకాశాలున్నాయి. ప్రస్తుతం కాంగ్రెస్ నుంచి పోటీ చేసేందుకు బలమైన అభ్యర్థులు లేకపోవడం ఆయనకు కలిసివచ్చే అంశం.
బీజేపీలో ముసలం..
ఇప్పటికే అంతర్గత కుమ్ములాటలతో అస్త్యవస్తంగా మారిన ఆదిలాబాద్ బీజేపీలో మాజీ ఎంపీ బీఆర్ఎస్ నేత గొడం నగేశ్ చేరిక మరింత కల్లోలం రేపుతోంది. నగేశ్కు బీజేపీ ఎంపీ టికెట్ వస్తుందనే ప్రచారంతో ఆ పార్టీ టికెట్ఆశిస్తున్న రాథోడ్ రమేశ్, జాదవ్ రాజేశ్ బాబు, జెడ్పీ చైర్మెన్ రాథోడ్ జనార్దన్, మాజీ ఎమ్మెల్యే రాథోడ్ బాపురావు తదితరులు ఢిల్లీ బాటపట్టారు. బీజేపీ అగ్రనేత బీఎల్ సంతోష్, ఇతర నేతలను కలిసి కొత్తగా వచ్చిన నగేశ్కు కాకుండా తమలో ఒకరికే ఇవ్వాలని పట్టుబట్టినట్లు తెలిసింది.
బీజేపీ సీనియర్ లీడర్, ఆదిలాబాద్ ఎంపీ సోయం బాపూరావు, శానసమండలి చైర్మన్, బీఆర్ఎస్ నేత గుత్తా సుఖేందర్ రెడ్డి, ఆయన కొడుకు అమిత్ రెడ్డి కాంగ్రెస్లో చేరేందుకు సిద్ధమయ్యారు. కొద్దిరోజులుగా సొంత జిల్లాల్లో ఇంటిపోరును ఎదుర్కొంటున్న ఈ ముగ్గురు నేతలు, టికెట్లపై క్లారిటీ రాకపోవడంతో పార్టీ మారాలనే నిర్ణయానికి వచ్చారు. ఆదిలాబాద్ టికెట్ కోసం సోయం, భువనగిరి టికెట్ కోసం అమిత్రెడ్డి హైదరాబాద్లో మకాం వేసి పార్టీ పెద్దలతో సంప్రదింపులు జరుపుతుండడం ఆసక్తి రేపుతోంది.
