ఏపీలోని శ్రీశైలంలో టీడీపీ ఎమ్మెల్యే బుడ్డా రాజశేఖర్ రెడ్డి తన అనుచరులతో కలిసి... ఫారెస్ట్ సిబ్బందిని అర్థరాత్రి కార్లలో తిప్పుతూ చిత్రహింసలకు గురి చేయటం కలకలం రేపిన సంగతి తెలిసిందే. ఈ ఘటనపై ఆగ్రహం వ్యక్తం చేసిన డిప్యూటీ సీఎం పవన్ కళ్యాణ్.. ఎమ్మెల్యే బుడ్డాపై కేసు నమోదు చేయాలంటూ ఆదేశాలు జారీ చేశారు. ఈ ఘటనపై కేసు నమోదు చేసి దర్యాప్తు చేస్తున్నారు పోలీసులు. శుక్రవారం ( ఆగస్టు 22 ) అటవీశాఖ మంత్రి అయిన పవన్ కళ్యాణ్ ను కలిసి తమ గోడు విన్నవించుకున్నారు ఫారెస్ట్ సిబ్బంది.
ఇదిలా ఉండగా.. ఈ కేసులో ఎమ్మెల్యే బుడ్డా రాజశేఖర్ రెడ్డిని ఏ2 గా చేర్చి.. జనసేన నేత అశోక్ రౌత్ ను ఏ1 గా చేర్చడం హాట్ టాపిక్ గా మారింది. ఇద్దరిపైనా బెయిలబుల్ కేసులు పెట్టడం గమనార్హం. అయితే.. టీడీపీ ఎమ్మెల్యేను తప్పించేందుకే ఈ కేసులో ఏ2 గా చేర్చారని, తమ పార్టీ నేతను ఏ1 గా చేర్చారని ఆరోపిస్తున్నారు జనసేన శ్రేణులు.
►ALSO READ | AP లిక్కర్ స్కాం : సిట్ అదుపులో మాజీ డిప్యూటీ సీఎం.. 3 రోజుల తనిఖీల తర్వాత..
ఈ అంశంపై ఫారెస్ట్ సిబ్బంది పవన్ కళ్యాణ్ ను కలిసి ఫిర్యాదు చేయడం కీలకంగా మారింది. ఈ ఘటనకు బాధ్యులపై కేసు నమోదు చేయాలని ఆదేశాలు జారీ చేశారు పవన్ కళ్యాణ్. గురువారం ( ఆగస్టు 21 ) జరిగిన క్యాబినెట్ భేటీలో సీఎం చంద్రబాబు, మంత్రి లోకేష్ ఎమ్మెల్యే బుడ్డాపై ఆగ్రహం వ్యక్తం చేసినట్లు తెలుస్తోంది. అయితే.. ఇప్పుడు జనసేన నేత అశోక్ రౌత్ ను ప్రధాన నిందితుడిగా చేర్చడంతో పోలీసులపై విమర్శలు వస్తున్నాయి.
