మహేష్ బాబు, రాజమౌళి కాంబినేషన్లో సినిమా కోసం ఎన్నాళ్లుగానో ఎదురుచూస్తున్న అభిమానులకు బిగ్ న్యూస్. మహేష్ హీరోగా జక్కన్న దర్శకత్వంలో సినిమా కన్ఫర్మ్ అయింది. ‘ఆర్ఆర్ఆర్’ తర్వాత రాజమౌళి దర్శకత్వంలో తెరకెక్కనున్న చిత్రం ఇదే కానుంది. ఈ విషయాన్ని స్వయంగా రాజమౌళే ప్రకటించారు. నిజానికి ఇది కొత్త విషయమేమీ కాదు. మహేష్ బాబు హీరోగా తాను ఓ సినిమా చేయనున్నానని, దుర్గా ఆర్ట్స్ అధినేత కె.ఎల్.నారాయణ నిర్మాణంలో ఈ చిత్రం ఉంటుందని రాజమౌళి ఇప్పటికే చాలాసార్లు ప్రకటించారు. ఆయన తండ్రి విజయేంద్రప్రసాద్ కూడా పలుమార్లు ఈ సినిమా గురించి ప్రస్తావించారు. మహేష్ సైతం రాజమౌళితో సినిమా ఉంటుందని చాలాసార్లు ఇంటర్వ్యూల్లో చెప్పాడు. అయితే ఎవరి సినిమాలతో వాళ్లు బిజీగా ఉండటం వల్ల ఈ సినిమా సెట్స్ వరకు వెళ్లలేదు. దీంతో అసలు ఈ కాంబినేషన్లో సినిమా ఉంటుందా అనే అనుమానాలు మొదలయ్యాయి. వీటన్నింటిపై స్పష్టతనిస్తూ ‘ఆర్ఆర్ఆర్’ తర్వాత తన సినిమా మహేష్ తోనే అని తాజాగా ప్రకటించాడు రాజమౌళి. తరణ్ ఆదర్శ్ లాంటి బాలీవుడ్ సినీ విశ్లేషకులు సైతం ఈ ప్రాజెక్ట్ గురించి ట్వీట్ చేశారు. 2022 లో ఈ సినిమా సెట్స్ కి వెళ్తుందని చెబుతున్నారు. వచ్చే ఏడాది సంక్రాంతికి ‘ఆర్ఆర్ఆర్’ విడుదల కానుంది. ఆ లెక్కన మహేష్ మూవీ ప్రీ ప్రొడక్షన్ కే ఏడాది సమయం తీసుకోనున్నారు రాజమౌళి. ఈలోపు తన కమిట్మెంట్స్ కంప్లీట్ చేసుకోనున్నాడు మహేష్. ఏదేమైనా మరో రెండేళ్లకు ఈ సినిమా ప్రారంభం కావచ్చేమో. సోషియో ఫ్యాంటసీ, హిస్టారికల్ టచ్ ఉన్న ఫిక్షన్ సినిమాలకి కేరాఫ్ అడ్రస్ అయిన జక్కన్న.. మహేష్ తో ఎలాంటి సినిమా చేయనున్నాడో మరి.
