- ఉత్తర్వులు జారీ చేసిన రాష్ట్ర ప్రభుత్వం
- 52 ఏండ్ల పాటు విద్యుత్ ఉత్పత్తి చేసిన పవర్ ప్లాంట్
- ఈ ప్లాంట్ స్థలంలోనే కొత్తగా 800 మెగావాట్ల ప్లాంట్ నిర్మాణానికి సర్కారు నిర్ణయం
హైదరాబాద్, వెలుగు: 50 ఏండ్లకు పైగా విద్యుత్ ఉత్పత్తిలో సేవలందించిన రామగుండం 62.5 మెగావాట్ల థర్మల్ పవర్ ప్లాంట్ను మూసివేయాలని రాష్ట్ర ప్రభుత్వం ఉత్తర్వులు జారీ చేసింది. 1971లో ప్రారంభమైన ఈ పవర్ ప్లాంట్ విద్యుత్ రంగంలో కీలక పాత్ర పోషించింది. ఐదు దశాబ్దాలకుపైగా రాష్ట్రానికి, దేశానికి సేవలందించి అనేక రికార్డులు, మైలురాళ్లను నెలకొల్పింది.
25 ఏండ్ల కాల పరిమితితో ఏర్పడిన ఈ పవర్ ప్లాంట్ 52 ఏండ్ల 7 నెలల పాటు సేవలందించింది. 3.68 లక్షల గంటలకు పైగా పనిచేసింది. మొత్తం 18,743.4 మిలియన్ యూనిట్ల విద్యుత్ ఉత్పత్తి చేసింది. పరికరాల సామర్థ్యం దగ్గర పడటంతో 2024, జూన్4న ఈ పవర్ ప్లాంట్లో విద్యుత్ ఉత్పత్తిని ఆపేశారు. దీనిని పూర్తిగా క్లోజ్ చేయడానికి అనుమతించాల్సిందిగా రాష్ట్ర జెన్కో సంస్థ ఈ ఏడాది జనవరిలోనే ప్రభుత్వానికి విజ్ఞప్తి చేసింది.
దీనిపై చర్చించిన ప్రభుత్వం 1971లో కమిషన్ చేయబడిన రామగుండం థర్మల్ స్టేషన్ (ఆర్టీఎస్బీ)ని మూసివేస్తున్నట్లుగా ప్రకటిస్తూ విద్యుత్ శాఖ ప్రిన్సిపల్ సెక్రటరీ నవీన్ మిట్టల్ ఈ నెల 6న జీవో నంబర్ 58 రిలీజ్ చేశారు. దీనిపై తదుపరి చర్యలు తీసుకోవాలని జెన్కో సీఎండీని ఆదేశించారు. అయితే, ఈ ప్లాంట్ ప్రాంతంలోనే కొత్తగా 800 మెగావాట్ల థర్మల్ పవర్ ప్లాంట్ నిర్మాణం చేపట్టాలని రాష్ట్ర ప్రభుత్వం నిర్ణయించింది. 62.5 మెగావాట్ల పవర్ ప్లాంట్ క్లోజ్ చేయడానికి చట్టపరమైన అనుమతులు రావడంతో, ఇక కొత్త పవర్ ప్లాంట్ నిర్మాణ పనులకు సంబంధించిన పనులు స్పీడందుకోనున్నాయి.
