మొగుళ్లపల్లి (టేకుమట్ల), వెలుగు : ఎంత చదివినా ప్రభుత్వ ఉద్యోగం రాకపోవడంతో తల్లిదండ్రులకు భారం కావొద్దని జయశంకర్ భూపాలపల్లి జిల్లా టేకుమట్ల మండల కేంద్రానికి చెందిన ఓ యువకుడు ఆదివారం ఉదయం బావిలో దూకి సూసైడ్ చేసుకున్నాడు. పోలీసుల తెలిపిన వివరాల ప్రకారం.. మండల కేంద్రానికి చెందిన బొమ్మ శివాజీ (24) అనే యువకుడు బీఎస్సీ అగ్రికల్చర్ డిప్లొమా కంప్లీట్ చేసి కొంతకాలంగా ప్రైవేట్కంపెనీలో జాబ్ చేసి పోటీ పరీక్షలకు ప్రిపేర్ అవుతున్నాడు.
ఇటీవల రాసిన పరీక్షతో తనకు జాబ్ రాదని, అమ్మ నాన్నలకు భారంగా మారుతున్నానని ఆవేదన చెందాడు. దీంతో పాటు ఓ మానసిక వ్యాధితో బాధపడుతున్నాడు. తమ వ్యవసాయ బావి వద్దకు వెళ్లి తన సోదరుడికి సెల్ ఫోన్లో అమ్మ నాన్నలను బాగా చూసుకో నేను సూసైడ్ చేసుకుంటున్నానని మెసేజ్ చేసి బావిలో దూకాడు. వెంటనే పోలీసులకు సమాచారం అందించడంతో బావి వద్దకు చేరుకొని స్థానికులు సాయంతో డెడ్ బాడీని బయటకు తీశారు.
