- హైదరాబాద్‌‌‌‌లో కొత్తగా మరో నాలుగు సెంటర్లు
- ఉద్యోగులు, పెన్షనర్లు, జర్నలిస్టులకు క్యాష్‌‌‌‌లెస్‌ ఓపీ
హైదరాబాద్, వెలుగు: రాష్ట్రంలోని ప్రభుత్వ ఉద్యోగులు, పెన్షనర్లు, జర్నలిస్టులకు స్థానికంగానే మెరుగైన వైద్య సేవలు అందించేందుకు ప్రభుత్వం కీలక నిర్ణయం తీసుకుంది. న్యూ ఎంప్లాయీస్‌ హెల్త్‌ స్కీమ్‌ (ఎన్‌‌‌‌ఈహెచ్‌‌‌‌ఎస్‌) పరిధిని విస్తరిస్తూ అదనంగా మరో 25 వెల్నెస్‌ సెంటర్లు ఏర్పాటు చేయాలని నిర్ణయించింది. ఈ మేరకు వైద్యారోగ్య శాఖ ఇప్పటికే ఆమోదం తెలిపింది. తాజాగా ఈ సెంటర్లను ఆయా జిల్లాల్లోని ప్రభుత్వ జనరల్‌ హాస్పిటళ్ల (జీజీహెచ్‌) ప్రాంగణాల్లోనే ఏర్పాటు చేయాలని నిర్ణయించారు. కొత్త సెంటర్లు అందుబాటులోకి వస్తే రాష్ట్రంలో వెల్నెస్‌ సెంటర్ల సంఖ్య 37కు చేరనుంది. ఈ సెంటర్ల ఏర్పాటుతో రాష్ట్రంలోని 33 జిల్లాల ఉద్యోగులు, పెన్షనర్లు ఓపీ సేవల కోసం హైదరాబాద్‌‌‌‌కో, ఇతర జిల్లాలకో వెళ్లాల్సిన అవసరం ఉండదు. తమ సొంత జిల్లా కేంద్రాల్లోని జీజీహెచ్‌‌‌‌లలోనే క్యాష్‌‌‌‌లెస్‌ ఓపీ సేవలు పొందొచ్చు. దీంతో ఉద్యోగులు, పెన్షనర్లు, జర్నలిస్టులకు స్థానికంగానే వైద్య సేవలు అందుబాటులోకి రానున్నాయి.
ప్రస్తుతం 12 జిల్లాల్లోనే..
ప్రస్తుతం రాష్ట్రంలోని 12 జిల్లాల్లో మాత్రమే వెల్నెస్‌ సెంటర్లు పనిచేస్తున్నాయి. హైదరాబాద్‌‌‌‌లోని ఖైరతాబాద్‌, మేడ్చల్‌-మల్కాజిగిరి జిల్లాలోని కూకట్‌‌‌‌పల్లి, రంగారెడ్డి జిల్లాలోని వనస్థలిపురంతోపాటు వరంగల్‌, కరీంనగర్‌, ఖమ్మం, నల్గొండ, నిజామాబాద్‌, మహబూబ్‌‌‌‌నగర్‌, ఆదిలాబాద్‌, సంగారెడ్డి, సిద్దిపేట కేంద్రాల్లో ఈ సెంటర్లు అందుబాటులో ఉన్నాయి. మిగతా జిల్లాల్లో వెల్నెస్‌ సెంటర్లు లేకపోవడంతో అక్కడి ఉద్యోగులు, పెన్షనర్లు ఓపీ సేవల కోసం ఇతర జిల్లాలకు వెళ్లాల్సి వస్తోంది. ఈ సమస్యను పరిష్కరించేందుకు ప్రభుత్వం కొత్త సెంటర్ల ఏర్పాటుపై దృష్టి పెట్టింది.
21 జిల్లాల్లో కొత్తగా ఏర్పాటు..
ఇప్పటివరకు వెల్నెస్‌ సెంటర్లు లేని 21 జిల్లాల్లోని జీజీహెచ్‌‌‌‌లలో కొత్త సెంటర్లు ఏర్పాటు చేయనున్నారు. మంచిర్యాల, నిర్మల్‌, కొమరం భీం ఆసిఫాబాద్‌, జగిత్యాల, పెద్దపల్లి, రాజన్న సిరిసిల్ల, జయశంకర్‌ భూపాలపల్లి, జనగామ, మహబూబాబాద్‌, ములుగు, భద్రాద్రి కొత్తగూడెం, సూర్యాపేట, యాదాద్రి భువనగిరి, నాగర్‌‌‌‌కర్నూల్‌, వనపర్తి, జోగులాంబ గద్వాల, నారాయణపేట, వికారాబాద్‌, మెదక్‌, కామారెడ్డి జిల్లాల్లో వీటిని ఏర్పాటు చేయనున్నారు. ఆయా జిల్లాల్లోని ప్రభుత్వ జనరల్‌ హాస్పిటళ్ల ప్రాంగణాల్లోనే ఈ సెంటర్లు అందుబాటులోకి రానున్నాయి.
హైదరాబాద్‌‌‌‌లో మరో నాలుగు..
గ్రేటర్‌ హైదరాబాద్ పరిధిలో రోగుల రద్దీ ఎక్కువగా ఉండటంతో మరో నాలుగు వెల్నెస్‌ సెంటర్లు ఏర్పాటు చేయాలని ప్రభుత్వం నిర్ణయించింది. దీంతో హైదరాబాద్‌‌‌‌లోని ఉద్యోగులు, పెన్షనర్లు, జర్నలిస్టులకు కూడా వైద్య సేవలు మరింత అందుబాటులోకి రానున్నాయి. రాష్ట్రవ్యాప్తంగా కొత్త సెంటర్ల ఏర్పాటు పూర్తయితే మొత్తం వెల్నెస్‌ సెంటర్ల సంఖ్య 37కు చేరుతుంది. అన్ని జిల్లాల్లో ఈ సదుపాయం అందుబాటులోకి వస్తే ఉద్యోగులు, పెన్షనర్లు స్థానికంగానే క్యాష్‌‌‌‌లెస్‌ ఓపీ సేవలు పొందే అవకాశం ఉంటుంది. వైద్య పరీక్షలు, మందులు, డాక్టర్ల కన్సల్టేషన్‌ కోసం దూర ప్రాంతాలకు వెళ్లాల్సిన ఇబ్బందులు తగ్గనున్నాయి.
