అన్నవరం దేవేందర్కు దాశరథి అవార్డు

• ఉత్తర్వులు జారీ చేసిన రాష్ట్ర ప్రభుత్వం

హైదరాబాద్/కరీంనగర్​, వెలుగు: 2025 సంవత్సరానికి గాను దాశరథి కృష్ణమాచార్య అవార్డుకు ప్రముఖ కవి, కాలమిస్ట్ అన్నవరం దేవేందర్ ఎంపికయ్యారు. ఈ మేరకు సోమవారం రాష్ట్ర ప్రభుత్వం ఉత్తర్వులు జారీ చేసింది. యువజన అభ్యున్నతి, పర్యాటక, సాంస్కృతిక శాఖ ప్రతి ఏటా ఈ పురస్కారాన్ని అందజేస్తుంది. ఈ అవార్డు ప్రదానానికి అవసరమైన చర్యలు తీసుకోవాలని ఆదేశించింది. అవార్డు గ్రహీతకు రూ.1,01,116 నగదు బహుమతితో పాటు జ్ఞాపిక, శాలువా అందజేస్తారు. ఈ అవార్డు గ్రహీతను ఎంపిక చేసేందుకు ప్రభుత్వం ఒక కమిటీ ఏర్పాటు చేసింది. 

భాషా, సాంస్కృతిక శాఖ డైరెక్టర్, కమిటీ సభ్య కార్యదర్శి తెలిపిన వివరాల ప్రకారం.. ఈ కమిటీ 2025, జులై 16న కళా భవన్, హైదరాబాద్‌‌‌‌లోని డైరెక్టర్ ఛాంబర్స్‌‌‌‌లో సమావేశమై అన్నవరం దేవేందర్ పేరును ప్రతిపాదించింది. ఈ ప్రతిపాదనను ప్రభుత్వం ఆమోదించింది. అన్నవరం దేవేందర్​ రాసిన రచనల్లో తొవ్వ, మరోకోణం (సామాజిక వ్యాసాలు), నడక, మంకమ్మ తోట లేబర్ అడ్డా,- బుడ్డపర్కలు (నానీలు),  బొడ్డు మల్లె చెట్టు, పొద్దు పొడుపు, ఫార్మాల్యాండ్ ఫ్రాగ్రెన్స్ వంటివి ఉన్నాయి.

కాగా, కరీంనగర్ జిల్లాకు చెందిన అన్నవరం దేవేందర్.. కవి, రచయిత, కాలమిస్ట్ గా 25 ఏండ్లుగా తెలంగాణ తెలుగులో కవిత్వాలు రాస్తున్నారు. 1986 టైమ్​లో వివిధ పత్రికల్లో జర్నలిస్టుగా పని చేశారు. పంచాయతీరాజ్ శాఖలో ఉద్యోగం చేసి రిటైర్ అయ్యారు. జాతీయ, రాష్ట్ర స్థాయిలో 25కు పైగా పురస్కారాలు అందుకున్నారు. నిరుడు ప్రముఖ కవి, రచయిత జూకంటి జగన్నాథంకు దాశరథి కృష్ణమాచార్య పురస్కారం లభించింది.