- మూడు రోజులుగా ఇదే పరిస్థితి
- సమాచారం కోసం అభ్యర్థుల తిప్పలు
హైదరాబాద్, వెలుగు : తెలంగాణ స్టేట్ పబ్లిక్ సర్వీస్ కమిషన్ (టీఎస్పీఎస్సీ) హెల్ప్ లైన్ నంబర్లు పనిచేయడం లేదు. మూడు రోజుల నుంచి ఇదే పరిస్థితి నెలకొనడంతో నిరుద్యోగులు ఇబ్బందులు పడుతున్నారు. ప్రస్తుతం కొత్త కమిషన్ యాక్టివ్ కావడంతో పలు రిక్రూట్మెంట్ల ప్రాసెస్ వేగవంతమైంది. ఈ క్రమంలో ఫోన్ నంబర్లు పనిచేయకపోవడంతో దూర ప్రాంతాల్లోని అభ్యర్థుల సందేహాలు తీర్చే వారు కరువయ్యారు.
టీఎస్పీఎస్సీ ఆఫీసులోకి అభ్యర్థులకు ఎంట్రీ లేదు. ప్రత్యేకమైన సమస్యలున్నవారిని మాత్రమే అనుమతిస్తారు. ఏదైనా సమాచారం కావాలంటే కమిషన్ హెల్ప్ లైన్ నంబర్లకు కాల్ చేసి తెలుసుకుంటున్నారు. అయితే, గత మూడు రోజులుగా కమిషన్ కాల్ సెంటర్ నంబర్లు (040– -22445566 / 040– -24746887) పనిచేయడం లేదు. ప్రస్తుతం గ్రూప్–1 అప్లికేషన్ల ప్రక్రియ ప్రారంభం కావడంతో పాటు పలు పరీక్షలకు సంబంధించిన ప్రిలిమినరీ కీలు, ఫైనల్ కీలను కమిషన్ రిలీజ్ చేసింది.
సెలక్షన్ లిస్టులనూ విడుదల చేసింది. ప్రస్తుతం గ్రూప్–2, 3 ఎగ్జామ్ డేట్లు, ఇతర పరీక్షలకు సంబంధించిన సమాచారం కోసం అభ్యర్థులు కమిషన్ను అడగాలంటే కొంత ఇబ్బందికరంగా మారింది. రెండు నంబర్లు పనిచేయకపోవడంతో వారంతా ఆందోళన చెందుతున్నారు. అయితే, బీఎస్ఎన్ఎల్ లైన్ ప్రాబ్లమ్ వల్లనే ఈ సమస్య ఏర్పడిందని కమిషన్ అధికారులు చెప్తున్నారు. రెండు రోజుల్లోనే సమస్య పరిష్కారం అవుతుందని ఆశాభావం వ్యక్తం చేస్తున్నారు.
