న్యూఢిల్లీ: మెసేజింగ్ ప్లాట్ఫామ్ టెలిగ్రామ్పై బ్యాన్ అంశం న్యాయస్థానానికి చేరింది. నీట్ యూజీ రీ-టెస్ట్కు ముందు తమ యాప్పై నిషేధం విధించిన కేంద్ర ప్రభుత్వ నిర్ణయాన్ని సవాల్ చేస్తూ టెలిగ్రామ్ బుధవారం (జూన్ 17) ఢిల్లీ హైకోర్టును ఆశ్రయించింది. తమ యాప్పై కేంద్ర ప్రభుత్వం విధించిన నిషేధాన్ని ఎత్తివేసేలా ఆదేశాలు ఇవ్వాలని టెలిగ్రామ్ కోర్టులో పిటిషన్ దాఖలు చేసింది. జస్టిస్ తేజస్ కారియా నేతృత్వంలోని ధర్మాసనం ఈ పిటిషన్ను విచారించనుంది. దీంతో కోర్టు తీర్పుపై ఉత్కంఠ నెలకొంది. కేంద్ర ప్రభుత్వ నిర్ణయంతో న్యాయస్థానం ఏకీభవిస్తుందా..? లేక టెలిగ్రామ్కు ఊరట దక్కుతుందా అనే చూడాలి.
టెలిగ్రామ్పై కేంద్రం తాత్కాలిక నిషేధం
నీట్-యూజీ (NEET-UG) రీ-టెస్ట్ నేపథ్యంలో మెసేజింగ్ ప్లాట్ఫామ్ టెలిగ్రామ్పై కేంద్ర ప్రభుత్వం తాత్కాలిక నిషేధం విధించిన విషయం తెలిసిందే. జూన్ 16 నుంచి 22వ తేదీ అర్ధరాత్రి వరకు ఇండియాలో టెలిగ్రామ్ సేవలను తాత్కాలికంగా నిలిపివేసింది. 2026, జూన్ 21న నీట్-యూజీ రీ-టెస్ట్ జరగనుంది. నీట్-యూజీ రీ-టెస్ట్లో పేపర్ లీక్, మాస్ కాపీయింగ్ వంటి అవకతవకలకు చెక్ పెట్టేందుకు ఎన్టీఏ సిఫార్స్ మేరకు కేంద్ర ప్రభుత్వం ఈ నిర్ణయం తీసుకుంది.
ఈ నిషేధం లీకులను ఆపదు: టెలిగ్రామ్
నీట్-యూజీ రీటెస్ట్ నేపథ్యంలో టెలిగ్రామ్పై కేంద్ర ప్రభుత్వం తాత్కాలిక నిషేధం విధించడాన్ని ఆ యాప్ వ్యవస్థాపకుడు, సీఈవో పావెల్ దురోవ్ తీవ్రంగా విమర్శించారు. ఈ నిర్ణయం అసలు సమస్యను అరికట్టకుండా లక్షలాది సాధారణ వినియోగదారులను ప్రభావితం చేస్తుందని అసంతృప్తి వ్యక్తం చేశారు. ఈ నిషేధం పేపర్ లీకులను ఆపలేదని.. కేవలం పేపర్ లీకులు టెలిగ్రామ్ నుంచి ఇతర యాప్లకు తరలిపోతాయని కీలక వ్యాఖ్యలు చేశారు.
►ALSO READ | ‘‘అసలు వీడు మనిషేనా..? పసికందును గాల్లోకి విసిరేస్తూ హ్యాపీగా ఫీల్ అవుతున్నాడు.. ఇదేం శాడిజం? ’’
“కొందరు వినియోగదారులు లీకైన పరీక్ష ప్రశ్నలను షేర్ చేశారన్న కారణంతో భారత ఐటీ మంత్రిత్వ శాఖ టెలిగ్రామ్ను ఒక వారం పాటు నిషేధించింది. ఇది భారతదేశంలోని 15 కోట్లకు పైగా సాధారణ టెలిగ్రామ్ వినియోగదారులను శిక్షిస్తుంది. అంతేగానీ పేపర్ లీక్ చేసిన వ్యక్తులను కాదు. ఈ నిషేధం దేన్నీ ఆపలేదు. భారత ప్రభుత్వ నిర్ణయంతో లీకులు టెలిగ్రామ్ నుంచి ఇతర యాప్లకు తరలిపోతాయి” అని పావెల్ దురోవ్ పేర్కొన్నారు.
