రాష్ట్రంలో ఓ వైపు వానలు.. మరో వైపు ఎండలు దంచికొడుతున్నాయి. అసలు ఇది ఎండకాలమా? వానకాలమా? అనే సందేహం కల్గుతోంది. రాష్ట్రంలో ఉష్ణోగ్రతలు మరింత పెరగనున్నాయని వాతావరణ శాఖ తెలిపింది. సాధారణ ఉష్ణోగ్రత కంటే 3 డిగ్రీల ఉష్ణోగ్రత ఎక్కవ నమోదయ్యే అవకాశముందని వెల్లడించింది. హైదరాబాద్ లో 42 డిగ్రీల వరకు నమోదయ్యే అవకాశం ఉందని తెలిపింది.
కరీంనగర్ లో అత్యధికంగా 45.1 డిగ్రీలు
రాష్ట్రంలో ఆదివారం వర్షాలతో పాటు కొన్నిచోట్ల ఎండలు కూడా దంచికొట్టాయి. కరీంనగర్ కలెక్టరేట్ వద్ద అత్యధికంగా 45.1 డిగ్రీల ఉష్ణోగ్రత నమోదైంది. పెద్దపల్లి జిల్లా ముత్తారం, నిర్మల్ జిల్లా లింగాపూర్లో 44.9 డిగ్రీలు, ఆదిలాబాద్ జిల్లా చాప్రాల, మంచిర్యాల జిల్లా కొమ్మెరల్లో 44.8, వీణవంకలో 44.6, రాజన్న సిరిసిల్ల జిల్లా మార్తాన్పేట, కామారెడ్డి జిల్లా సర్వాపూర్, ఆదిలాబాద్ జిల్లా అర్లిటిలో 44.5, సిరిసిల్ల జిల్లా పెద్దూరులో 44.4 డిగ్రీల టెంపరేచర్లు రికార్డయ్యాయి. హైదరాబాద్ గచ్చిబౌలిలో 42.2 డిగ్రీల ఉష్ణోగ్రత నమోదయింది. ఎండల తీవ్రత దక్షిణ తెలంగాణతో పోలిస్తే ఉత్తర తెలంగాణ జిల్లాల్లోనే అధికంగా ఉందని అధికారులు తెలిపారు. అయితే, రెండు రోజుల్లో ఉష్ణోగ్రతలు కొద్దిగా తగ్గే అవకాశం ఉందని చెప్తున్నారు.
