కీసర, వెలుగు : మేడ్చల్మల్కాజిగిరి జిల్లా కీసర పీఎస్పరిధిలోని నాగారం మారుతీనగర్‌‌లో ఒకే దుకాణాన్ని లక్ష్యంగా చేసుకున్న దొంగలు 20 రోజుల్లో రెండు సార్లు దొంగతనం చేసి రూ.6 లక్షల సామగ్రి ఎత్తుకెళ్లారు. మారుతీనగర్లోని శ్రీరామ ఎలక్ట్రికల్, పెయింట్ అండ్ శానిటరీ షాపులో గత నెల 21న చోరీ జరిగింది. గడ్డపారతో షట్టర్ను పైకి లేపి లోపలున్న పెయింట్డబ్బాలు, ఇతర వస్తువులు కలిపి రూ.1.50 లక్షల విలువైన సామగ్రి ఎత్తుకువెళ్లారు.
దీనిపై అప్పుడే పోలీసులకు ఫిర్యాదు కూడా చేశారు. అయితే, ఆదివారం తెల్లవారుజామున కూడా మళ్లీ అదే షాపులో దొంగలు పడి రూ.4.50 లక్షల విలువైన సామగ్రి అపహరించారు. ఈ రెండు చోరీల సీసీ టీవీ ఫుటేజీ ఉన్నా నిందితుడిని ఇప్పటివరకు గుర్తించలేదని యజమాని ప్రవీణ్ వాపోయాడు. కీసర పోలీసులు కేసు నమోదు చేసి దర్యాప్తు చేస్తున్నారు.
