ఇప్పుడు ప్రపంచమంతా కరోనా వ్యాక్సిన్ డ్రైవ్ నడుస్తోంది. అయితే, హాస్పిటల్స్, పీహెచ్సీలకు వెళ్లి వ్యాక్సిన్ వేసుకోమంటే హాస్పిటల్ వాతావరణం, వ్యాక్సిన్ మీద ఉన్న భయాలతో చాలామంది ఇంట్రెస్ట్ చూపిస్తలేరు. అందుకే కొన్ని దేశాలు జనం వద్దకే వ్యాక్సిన్ సెంటర్స్ను తీసుకొచ్చాయి. టిక్టాక్ స్టూడియో, సినిమాహాల్, షాపింగ్ మాల్, ఆర్టీసీ బస్సులు, గుళ్ళు, గోపురాలు.. వీటిని టెంపరరీగా వ్యాక్సిన్ సెంటర్స్ చేశాయి. ‘వ్యాక్సిన్ మాకు వద్దంటే వద్ద’ని మొండికేసే వాళ్లను కూడా మోటివేట్ చేసేలా ఉన్న ఈ వ్యాక్సిన్ సెంటర్లపై ఓ లుక్కేద్దాం...
సినిమా హాల్స్
ఫిలిప్పీన్స్లో మార్చి నుంచే కరోనా వ్యాక్సిన్ వేస్తున్నారు. అయితే, ప్రజలు వ్యాక్సిన్ వేసుకునేందుకు ముందుకు రావట్లేదు. దాంతో ఆ దేశ ప్రెసిడెంట్ రోడ్రిగో దుతెర్తె ‘కరోనా వ్యాక్సిన్ వేసుకుంటారా.. జైల్లో పెట్టమంటరా.. ఈ రెండింటిలో ఏది కావాలో డిసైడ్ అవ్వండి’ అని వార్నింగ్ ఇచ్చారు. ప్రజల్ని వ్యాక్సిన్ డ్రైవ్వైపు నడిపించేందుకు హెల్త్ ఆఫీసర్స్ ఒక సినిమా థియేటర్ను కరోనా వ్యాక్సిన్ కేంద్రంగా మార్చారు. ఇప్పుడు అక్కడి జనం సరదాగా సినిమా హాల్కు వెళ్లి, టికెట్ కౌంటర్లలో పేరు రిజిస్టర్ చేసుకొని, వ్యాక్సిన్ వేసుకుంటున్నారు.
షాపింగ్ మాల్స్
బ్యాంకాక్లో షాపింగ్ మాల్స్లో వ్యాక్సిన్ వేస్తున్నారు. హాస్పిటల్స్ దగ్గర్లో ఉన్న షాపింగ్మాల్స్ను కరోనా వ్యాక్సిన్ సెంటర్స్ చేయడంతో ప్రజలు ఏ భయం లేకుండా వస్తున్నారు. దాదాపు 12కుపైగా షాపింగ్ మాల్స్ టెంపరరీగా వ్యాక్సిన్ సెంటర్లుగా మారాయి. మెక్సికోలో అయితే బస్సులో కూర్చొంటే చాలు. హెల్త్ వర్కర్లు వచ్చి వ్యాక్సిన్ వేస్తారు. అలాగే జపాన్లో సాకర్ క్లబ్స్, లండన్లో ఫుట్బాల్ స్టేడియం ... ఇప్పుడు మాస్ వ్యాక్సిన్ డ్రైవ్ సెంటర్లుగా మారాయి. ఈ వెరైటీ వ్యాక్సిన్ సెంటర్లు ప్రజల్లో భయాన్ని పోగొడుతూనే, తక్కువ టైంలోనే మాస్ వ్యాక్సినేషన్ పూర్తయ్యేందుకు పనికొస్తున్నాయి.
