శరీరానికి అవసరమైన అతిముఖ్యమైన పోషకం ప్రొటీన్. అయితే కండరాల సైజ్ పెరగడానికి మాత్రమే ప్రొటీన్ పనికొస్తుంది అనుకుంటాం. కానీ జీవక్రియలు, రక్తంలో ఆక్సిజన్ సరఫరా, అనారోగ్యం, ఇన్ఫెక్షన్ల బారిన పడకుండా చూసే యాంటీ బాడీల ఉత్పత్తికి కూడా ప్రొటీన్లు చాలా అవసరం. లైఫ్ స్టైల్, హెల్త్ను బట్టి ప్రొటీన్ల అవసరం ఒక్కొక్కరిలో ఒక్కోలా ఉంటుంది. ప్రొటీన్ తగ్గినప్పుడు కనిపించే లక్షణాలివి..
మూడ్ మారుతుంది
ప్రొటీన్ తక్కువైనప్పుడు మూడ్ ఒకేలా ఉండదు. చిరాకు, అయోమయం, ఆలోచనా శక్తి తగ్గడం వంటి లక్షణాలు కనిపిస్తాయి. మూడ్స్కు కారణమయ్యే సెరటోనిన్ వంటి పలు రకాల హార్మోన్లు, న్యూరోట్రాన్స్మీటర్ల తయారీలో ప్రొటీన్ ఎంతో కీలకం. రోజులో శరీరానికి అందాల్సిన ప్రొటీన్ అందకపోతే మూడ్ స్వింగ్స్ ఎక్కువవుతాయి.
ఎముకల బలం
ఎముకలు దృఢంగా ఉండేందుకు క్యాల్షియం కావాలి. వాల్యూమ్ పరంగా చూస్తే సగానికి పైగా బోన్స్ ప్రొటీన్తో తయరైనవే. బోన్స్ స్ట్రాంగ్గా, హెల్దీగా ఉండేందుకు విటమిన్–డి, క్యాల్షియంతో పాటు డైటరీ ప్రొటీన్ కూడా చాలా అవసరం. వయసు పై బడుతున్న కొద్దీ ఎముకల్లో లవణాలు తగ్గకుండా చూడడంలో ప్రొటీన్ల రోల్ ఎంతో కీలకం.
తినాలనిపిస్తుంది
శరీరానికి రోజూ కొంత మోతాదులో కొన్ని పోషకాలు అవసరం. ప్రొటీన్ ఫుడ్ తగినంత తిననప్పడు రక్తంలో చక్కెర తగ్గిపోతుంది. అప్పుడు ఏదైనా తినాలనే కోరిక పుడుతుంది.
వీటికి మరీ అవసరం
చర్మం, వెంట్రుకలు, గోళ్లు పూర్తిగా ప్రొటీన్తో తయారవుతాయి. అందుకే, ప్రొటీన్ తగ్గితే ఆ ప్రభావం వీటిపై పడుతుంది. ప్రొటీన్ మరీ తక్కువైతే చర్మం ఎర్రబారి, పగుళ్లు కనిపిస్తాయి. స్కిన్ రంగు మారుతుంది. వెంట్రుకలు సన్నగా అయి ఊడిపోతాయి. అలాగే గోళ్లు పెలుసుగా మారి విరిగిపోతాయి.
కండరాల కోసం...
- సరైన ఫుడ్ తింటూ, రెగ్యులర్గా ఎక్సర్సైజ్ చేస్తున్నప్పటికీ ఫ్యాట్ కరిగినట్టు అనిపించడం లేదా! అయితే, ప్రొటీన్ సరిపోను తినడం లేదని అర్థం. చాలినంత ప్రొటీన్ తినకపోతే శరీరం కండరాలను సరిగ్గా రిపేర్ చేయలేదు. దాంతో ఫ్యాట్ బర్న్ చేయడం అటుంచి, కండలు కరిగిపోతాయి. అంతేకాకుండా డైలీ ఫుడ్లో ప్రొటీన్ తగ్గితే ఎనర్జీ లెవల్స్ పడిపోతాయి.
- కిలో బరువుకు సుమారు1-1.5 గ్రాముల ప్రొటీన్ అవసరం. అంటే, 60 కిలోల బరువు ఉన్నవాళ్లు రోజుకు 60 నుంచి 90 గ్రాముల ప్రొటీన్ తినాలి. మాంసం, గుడ్లు, చేపలు, పాల పదార్థాలు, సోయా, చిక్కుడు వంటివి తింటే ప్రొటీన్ సరిపోను అందుతుంది. అయినా కూడా ప్రొటీన్ చాలకపోతే వే ప్రొటీన్, వేగన్ ప్రొటీన్ పౌడర్ వంటి సప్లిమెంట్లు తీసుకోవచ్చు. అయితే, న్యూట్రిషనిస్ట్ల సలహా తీసుకున్నాకే వీటిని వాడాలనే విషయం గుర్తుంచుకోవాలి.
