ఐపీఎల్ లో మరో భారీ స్కోర్ నమోదయింది. ఈడెన్ గార్డెన్స్ వేదికగా పంజాబ్ కింగ్స్ పై కోల్‌కతా నైట్ రైడర్స్ విరుచుకుపడింది. సొంతగడ్డపై గర్జిస్తూ పంజాబ్ బౌలర్లను ఉతికారేశారు. టాస్ ఓడి మొదట బ్యాటింగ్ చేసిన కేకేఆర్ నిర్ణీత 20 ఓవర్లలో 6 వికెట్ల నష్టానికి 261 పరుగుల భారీ స్కోర్ చేసింది.
ఈ మ్యాచ్ లో పంజాబ్ టాస్ గెలిచి ఫీల్డింగ్ ఎంచుకుంది. తాము తీసుకున్న నిర్ణయం ఎంత పెద్ద తప్పో పవర్ ప్లే లోనే పంజాబ్ కు తెలిసి వచ్చింది. ఈ సీజన్ లో టాప్ ఫామ్ లో ఉన్న కేకేఆర్ ఓపెనర్లు సునీల్ నరైన్, ఫిల్ సాల్ట్ ఆకాశమే హద్దుగా చెలరేగారు. ఏ బౌలర్ ను వదలకుండా ఉతికారేశారు. తొలి వికెట్ కు వీరిద్దరూ 62 బంతుల్లోనే 138 పరుగులు జోడించి అదిరిపోయే శుభారంభం ఇచ్చారు.
నరైన్ 32 బంతుల్లో 9 ఫోర్లు, 4 సిక్సులతో 71 పరుగులు చేస్తే.. సాల్ట్ 37 బంతుల్లో 6 ఫోర్లు, 6 సిక్సులతో 75 పరుగులు చేశాడు. వీరి ధాటికి పవర్ ప్లే లో ఏకంగా 76 పరుగులు వచ్చాయి. పవర్ ప్లే తర్వాత ఈ జోడీ మరింత విధ్వంసం సృష్టించింది. తర్వాత నాలుగు ఓవర్లలో ఏకంగా 62 పరుగులు రాబట్టింది.
ఓపెనర్లు ఔటైనా.. రస్సెల్ (12 బంతుల్లో 24), వెంకటేష్ అయ్యర్(23 బంతుల్లో 39), శ్రేయాస్ అయ్యర్ ( 10 బంతుల్లోనే 28) చివర్లో బ్యాట్ ఝళిపించడంతో పంజాబ్ స్కోర్ 250 పరుగుల మార్క్ దాటింది. పంజాబ్ బౌలర్లలో అర్షదీప్ సింగ్ 2 వికెట్లు తీసుకోగా.. సామ్ కరణ్, హర్షల్ పటేల్ చెరో వికెట్ పడగొట్టారు. కేకేఆర్ బ్యాటర్ల ధాటికి రబడా 3 ఓవర్లలోనే 52 పరుగులు.. సామ్ కరణ్ నాలుగు ఓవర్లలో 60 పరుగులు సమర్పించుకున్నారు.
Time to switch modes from batting to bowling 🕹️ pic.twitter.com/Sl4M0WbCRr
— KolkataKnightRiders (@KKRiders) April 26, 2024
