రంగారెడ్డి జిల్లా చేవెళ్లలో ఘోర రోడ్డు ప్రమాదం జరిగింది. టిప్పర్, బ్రీజా కారు ఢీకొనడంతో ఒకరికి తీవ్ర గాయాలయ్యాయి. మంగళవారం ( మార్చి 3 ) జరిగిన ఈ ఘటనకు సంబంధించి వివరాలిలా ఉన్నాయి... చేవెళ్ల మండలం దామరగిద్ద దగ్గరున్న పెట్రోల్ బంక్ సమీపంలో టిప్పర్, బ్రీజా కారు ఢీకొనడంతో ప్రమాదం చోటు చేసుకుంది. ఈ ఘటనలో కారులో ప్రయాణిస్తున్న పటేల్ ప్రవీణ్ అనే యువకుడికి తీవ్ర గాయాలయ్యాయి.
ఈ ప్రమాదంలో తీవ్రంగా గాయపడ్డ ప్రవీణ్ ను ఆసుపత్రికి తరలించి చికిత్స అందిస్తున్నారు. ప్రవీణ్ పూడూరు మండలం కండ్లపల్లి గ్రామవాసిగా గుర్తించారు పోలీసులు. మార్చి 5న ప్రవీణ్ పెళ్లి ఉండటంతో పెళ్లి పనులు చూసుకొని ఇంటికి తిరిగి వెళ్తున్న క్రమంలో ఈ ప్రమాదం చోటు చేసుకుంది.
ప్రమాదం జరిగిన సమయంలో హైవేపై భారీగా ట్రాఫిక్ జామ్ అయ్యింది. ఈ ఘటనపై సమాచారం అందుకున్న పోలీసులు ఘటనాస్థలానికి చేరుకొని ట్రాఫిక్ ను క్లియర్ చేశారు. ఈ ఘటనకు సంబంధించి పూర్తి వివరాలు తెలియాల్సి ఉంది. రెండు రోజుల్లో పెళ్లి ఉండగా ప్రవీణ్ యాక్సిడెంట్ లో తీవ్రంగా గాయపడటంతో అతని కుటుంబంలో విషాదం మునిగిపోయింది.
