కేఎల్ఐ కెనాల్కు చెట్లు అడ్డమచ్చినయట!

రూ.5 లక్షల పరిహారం చెల్లించక మూడేండ్లుగా పనులు బంద్
60 వేల ఎకరాలకు అందని సాగునీరు
బీఆర్ఎస్ జమానాలో పాలమూరు ప్రాజెక్టులపై నిర్లక్ష్యానికి ఇదో పరాకాష్ఠ

నాగర్ కర్నూల్.వెలుగు: కాల్వా.. కాల్వా.. ఎందుకు ఆగినవంటే చెట్లు అడ్డమచ్చినయ్ అన్నదట! 210 టేకుచెట్లకు రూ.5 లక్షల పరిహారం ఇచ్చేందుకు ఆఫీసర్లు ససేమిరా అనడంతో ఓ రైతు కాల్వ పనులు అడ్డుకున్నాడు. దీంతో కెనాల్ నిర్మాణానికి బ్రేక్ పడి మూడేండ్లుగా 60 వేల ఎకరాలకు నీళ్లందడం లేదు. ఇరిగేషన్కు పెద్దపీట వేశామని గొప్పలు చెప్పుకున్న నాటి బీఆర్ఎస్ ప్రభుత్వ హయాంలో పాలమూరు ప్రాజెక్టులపై కొనసాగిన వివక్షకు ఇదో నిదర్శనం. కృష్ణా నదిపై చేపట్టిన కల్వకుర్తి లిఫ్ట్ ఇరిగేషన్ స్కీం పరిధిలోని 29వ ప్యాకేజీలో భాగంగా నాగర్కర్నూల్జిల్లా కల్వకుర్తి మండలం జంగారెడ్డిపల్లి నుంచి మాడ్గుల మండలం నాగిళ్ల వరకు 58 కిలోమీటర్ల (టెయిల్ఎండ్ డిస్టిబ్యూటర్) కెనాల్ నిర్మాణానికి 2018లో బీఆర్ఎస్ సర్కారు రూ.300 కోట్లు కేటాయించింది. వెల్దండ, ఆమనగల్లు, మాడ్గుల మండలాల పరిధిలో 60వేల ఎకరాలకు సాగునీరందించాల్సిన ఈ కెనాల్ నిర్మాణానికి అవసరమైన భూ సేకరణ, నిర్మాణ పనులకు నిధులను సకాలంలో విడుదల చేయడంలో నాటి ప్రభుత్వం తీవ్ర నిర్లక్ష్యం వహించింది. జంగారెడ్డిపల్లి నుంచి వెల్డండ మండలం చెర్కూర్ గ్రామశివారు వరకు కాలువ నిర్మాణం ఎలాగోలా పూర్తయినా అక్కడి నుంచి ముందుకు కదలలేదు.

అడ్డం పడిన టేకు చెట్లు..

వెల్దండ మండలం చెర్కూర్ గ్రామ శివారులో కెనాల్ తవ్వకానికి మొదట అటవీ భూములు అడ్డుపడ్డాయి. 300 మీటర్ల పొడవునా అడవి మధ్యలోంచి కాల్వ నిర్మాణానికి అటవీశాఖ నుంచి క్లియరెన్స్ కు రెండేండ్ల టైం పట్టింది. ఈ సమస్య పరిష్కారం అయ్యిందనుకునే లోపే చెర్కూర్ శివారులోని ఒక రైతు పొలంలో 120 టేకు చెట్లు కెనాల్ నిర్మాణానికి అడ్డువచ్చాయి. వాటికి ఎస్టిమేట్ వేసిన ఆఫీసర్లు రూ.5 లక్షలు పరిహారం ఇవ్వాలని నిర్ణయించారు. ప్రభుత్వం నుంచి పరిహారం రాకపోవడంతో పనులను రైతు అడ్డుకున్నాడు. ఆఫీసర్లు నచ్చజెప్పినా రైతు ససేమిరా అనడంతో కెనాల్ వర్క్స్ నిలిచిపోయాయి. ఆ తర్వాత 58 కిలోమీటర్లు తవ్వాల్సిన కెనాల్ నిర్మాణానికి బ్రేక్పడినట్లయింది. నాటి ప్రజాప్రతినిధులుగానీ, ఆఫీసర్లుగానీ ప్రభుత్వం నుంచి రూ.5లక్షలు ఇప్పించలేకపోవడంతో 60వేల ఎకరాలు సాగునీటికి నోచుకోని పరిస్థితి వచ్చింది.

పరిహారం అందితేనే కాల్వ పనులు..

డి- 82 కెనాల్ కింద పోతున్న భూములు నాగర్ కర్నూల్, రంగారెడ్డి జిల్లాల పరిధిలోకి వస్తాయి. నాగర్ కర్నూల్ జిల్లాలో కల్వకుర్తి, వెల్డండ, చారకొండ, వంగూరు మండలాలు, రంగారెడ్డి జిల్లాలో ఆమనగల్, మాడ్గుల మండలాల పరిధిలో దాదాపు 450 ఎకరాలు భూ సేకరణ చేయాల్సి ఉంది. ఇందుకు రూ. 38 కోట్లు అవసరం అవుతాయని ఇరిగేషన్ ఆఫీసర్లు ప్రపోజల్స్ రెడీ చేశారు. ఇందుకు సంబంధించి 2020లోనే టోకెన్లు ఇచ్చిన ప్రభుత్వం రైతులకు పరిహారం చెల్లించేందుకు అనుమతి ఇవ్వలేదు.

నాగర్ కర్నూల్ జిల్లాలోని 60మంది రైతులకు రూ.20 కోట్లు, రంగారెడ్డి జల్లాలోని 150 మంది రైతులకు రూ.18 కోట్లు చెల్లించాల్సి ఉంది. కాగా, రంగారెడ్డి జిల్లాలో 150 మంది రైతులకు చెల్లించాల్సిన రూ.18 కోట్లు రంగారెడ్డి జిల్లా కలెక్టర్ పీడీ అకౌంట్లో జమ య్యాయి. కానీ, ఈ జిల్లాలో భూ సేకరణ విభాగం లేకపోవడంతో సాంకేతిక సమస్య ఏర్పడినట్లు తెలుస్తోంది. ఉన్నతాధికారులు, ప్రజాప్రతినిధులు చొరవ తీసుకుంటే తప్ప కెనాల్ నిర్మాణం సాధ్యం కాదని, ఆ దిశగా చర్యలు తీసుకోవాలని రైతులు కోరుతున్నారు.