దీపావళి పండుగ రోజున పాతబస్తీలో కందికల్ గేట్లో విషాదం చోటుచేసుకుంది. పీయూపీ వర్క్ యూనిట్ ఓపెన్ స్థలంలో జరిగిన పేలుళ్లలో వెస్ట్ బెంగాల్కు చెందిన ఇద్దరు యువకులు మృతి చెందగా, ఉత్తర్ ప్రదేశ్కు చెందిన మరో యువకుడు తీవ్ర గాయాలపాలై ఉస్మానియా ఆసుపత్రిలో చికిత్స పొందుతున్నాడు.
పాతబస్తీ కందికల్ గేట్ ప్రాంతంలో ఉల్లాస్ అనే వ్యక్తి గత కొంత కాలంగా ప్లాస్టర్ ఆఫ్ ప్యారీస్ (పీయుపీ) బొమ్మలు తయారు చేసే యూనిట్ను నడుపుతున్నాడు. దీపావళి పూజ అనంతరం కొన్ని టపాసులను ఆ యూనిట్లో పనిచేసే వెస్ట్ బెంగాల్కు చెందిన విష్ణు (25), జగన్ (30), ఉత్తర్ ప్రదేశ్కు చెందిన బీరెన్ (25) అనే కార్మికులకు ఇచ్చి వెళ్ళిపోయాడు. కార్మికులు పటాకులు కాల్చుతుండగా అర్థరాత్రి ఒక్కసారిగా పేలుడు జరిగింది. ఈ పేలుడులో విష్ణు, జగన్లు అక్కడికక్కడే మృతి చెందగా.. బీరెన్ తీవ్ర గాయాలపాలయ్యాడు. పేలుడు శబ్దానికి ఉలిక్కిపడ్డ స్థానికులు ఛత్రినాక పోలీసులకు సమాచారం అందించారు. ఘటనా స్థలికి చేరుకున్న ఫలక్నుమా ఏసీపీ మాజిద్, ఇన్స్పెక్టర్ దేవేందర్, ఛత్రినాక ఇన్స్పెక్టర్ ఖాదర్ జిలాని పరిస్థితిని సమీక్షించారు. తీవ్రంగా గాయపడిన బీరెన్ను చికిత్స నిమిత్తం ఉస్మానియా ఆసుపత్రికి తరలించారు. ఘటనా స్థలికి క్లూస్ టీమ్ను రప్పించి ఆధారాలు సేకరించారు. చనిపోయిన వారి మృతదేహాలను పోస్టుమార్టం నిమిత్తం ఉస్మానియా మార్చురీకి తరలించారు. పేలుడు గల కారణాలు తెలుసుకునేందుకు పోలీసులు ప్రయత్నిస్తున్నారు.
